Ուրիշի սխալներից դասեր չեք քաղում, գոնե ձեր սխալներից քաղե՛ք. Շարմազանովը՝ իշխանությանը

ԵՐԵՎԱՆ, ՄԱՐՏԻ 23, 24News

շարմազ

ՀՀԿ ԳՄ անդամ Էդուարդ Շարմազանովը ֆեյսբուքյան էջում գրառում է արել՝ անդրադառնալով արտակարգ դրությամբ երկրում ստեղծված իրավիճակին.

«Երբ տարածաշրջանում նոր էր սկսվել կորոնավիրուսի համաճարակը՝ Հայաստանի ղեկավարությունը հույս ուներ «թո՛ւ, թո՛ւ, թո՛ւ» անելով զերծ մնալ վարակի տարածումից։

Երբ ամբողջ Եվրոպան ու մեր տարածաշրջանի երկրները չեղարկում էին զանգվածային միջոցառումները, մեր իշխանությունը հանրահավաքներ էր կազմակերպում՝ հույս ունենալով պինցետով հատիկ հատիկ քաշել ու տնական օղիով ախտահանել կորոնավիրուսը։

Ավաղ, կառավարության ու անձամբ Փաշինյանի այս մեթոդները սպասված արդյունք չտվեցին…

Հիմա էլ պարետ Ավինյանը չի բացառում արտակարգ ռեժիմի դադարեցումը ժամկետից շուտ։

Խուճապ տարածելը շատ վատ է, բայց պակաս վտանգավոր չէ կասկածելի սպասումներ առաջացնելը։

Ուրիշի սխալներից դասեր չեք քաղում, գոնե ձեր սխալներից դասեր քաղեք։

Ուսումնական հաստատություններում դասերն էլ մարտի 1-ից վերսկսեցիք հապճեպ, ու ի՞նչ։ Արդյունքում վարակվածների թիվը կտրուկ ավելացավ։

Համաճարակի դեմ պայքարելն ու համաճարակի կանխումը PR չէ։

Աշխարհը դեռ չի կարող որևէ կանխատեսում անել, դուք հապճեպ գնահատականներ եք տալիս։

Վեր կանգնեք դրանից ու համատեղ ուժերով պայքարենք այս համաճարակի դեմ։

Ամեն բան լավ է լինելու։ Առողջ եղեք։

Հ. Գ.Համաճարակին դիմակայելն ու կանխելը բաժակաճառ ասել չէ։

Բավական է՝ լայվով միտինգ անեք, գո՛րծ արեք, գո՛րծ»: