ԵՐԵՎԱՆ, ՄԱՐՏԻ 30, 24News
«COVID-19 Հայաստան» փաստահավաք խումբը հայտարարություն է տարածել կորոնավիուսի դեմ պայքարի շրջանակում մեկուսացվածների իրավունքների մասով:
«Հայաստանում նոր կորոնավիրուսային հիվանդության համավարակի դեմ պայքարի շրջանակներում իրականացվում է վարակված անձանց մեկուսացում տարբեր հյուրանոցներում և հիվանդանոցներում:
Նախկինում մեր արած հայտարարության մեջ արդեն նշվել է, որ նմանատիպ հիմնարկները, ըստ էության, հանդիսանում են ազատազրկման վայրեր: Սա նշանակում է, որ այդ վայրերում անձանց պահելու մասով անհրաժեշտ է սահմանել առնվազն դատախազական հսկողություն:
«COVID-19 Հայաստան» Փաստահավաք խմբի այդ դիտարկումն անտեսվել է թե՛ պարետատան, թե՛ դատախազության կողմից:
Գտնում ենք, որ փաստացի ազատազրկված (մեկուսացված) անձանց իրավունքների անհարկի սահմանափակումներից և խախտումներից խուսափելու համար անհրաժեշտ է Մարդու իրավունքների պաշտպանի միջամտությունը՝ համապատասխան հսկողություն իրականացնելու եղանակով:
Մարդու իրավունքների պաշտպանին կոչ ենք անում ստուգել նշված ազատազրկման վայրերում անձանց պահելու հիմքերի, ռեժիմի, ժամանակին ազատ արձակման և բողոքարկման իրավունքի ապահովումը:
«COVID-19 Հայաստան» Փաստահավաք խմբի հետ կարող եք կապ հաստատել զանգահարելով 043 20 52 63 հեռախոսահամարին կամ գրելով [email protected] էլ․ հասցեին»,-նշվում է հայտարարության մեջ։