ԵՐԵՎԱՆ, ՄԱՐՏԻ 31, 24News
Ստեփանակարետի 1/32 ընտրատարածքում մարտի 31-ին՝ ժամը՝ 10:00-ին, իր քաղաքացիական պարտքն է կատարել «Վերածնունդ» կուսակցության կողմից առաջադրված ԱՀ նախագահի թեկնածու Հայկ Խանումյանը: «Արցախպրես»-ի թղթակցի հետ զրույցում Հայկ Խանումյանն ասել է, որ քվեարկել է հանուն իրական փոփոխությունների:
«Ցանկանում եմ տեսնել այնպիսի Արցախ, որը կկարողանա դիմակայել բոլոր մարտահրավերներին: Շատ կարևոր է, որ մեր տնտեսությունը լինի այնպիսին, որ կարողանանք ֆորսմաժորային իրավիճակներին դիմակայել: Ցավոք սրտի, այս տարիների ընթացքում չենք կարողացել ստեղծել նման տնտեսություն և պետություն, որն իր ինստիտուտներով ի վիճակի լինի դիմակայել բոլոր դժվարություններին»,- ասել է նախագահի թեկնածուն:
Ըստ նրա՝ համապետական ընտրություններին ԱՀ նախագահի բոլոր թեկնածուների և կուսակցությունների համար ֆորմալ առումով ստեղծվել են հավասար պայմաններ: Ընտրությունների համար բավականին մեծ գումարներ են ծախսվել, որն աննախադեպ է Արցախի պատմության եւ Հարավային Կովկասի համար:
Նշենք նաև, որ նա ընտրատեղամասում եղել է դիմակով և ձեռնոցով: