ԵՐԵՎԱՆ, ՄԱՅԻՍԻ 22, 24News
Առողջապահության նախարար Արսեն Թորոսյանը ֆեյսբուքյան էջում գրառում է արել՝ անդրադառնալով COVID-19-ին բնորոշ սուբյեկտիվ և օբյեկտիվ ախտանիշների մասին։
«Որոշել եմ պատմել կորոնավիրուսային հիվանդությանը բնորոշ սուբյեկտիվ և օբյեկտիվ ախտանիշների մասին։
Օբյեկտիվ կարևոր ախտանիշներից մեկը արյան՝ թթվածնով հագեցվածությունն է կամ, ինչպես բժիշկներն են ասում, թթվածնի սատուրացիան (SpO2):
Այն նորմայում պետք է լինի 95 %-ից բարձր, և դա նշանակում է, որ թոքերում թթվածնի փոխանցումը արյան մեջ տեղի է ունենանում բավարար քանակով և օրգանիզմում թթվածնաքաղց չի առաջանում:
Երբ կորոնոավիրուսի պատճառով առաջանում է թոքաբորբ և թոքերի մի հատվածը դուրս է մնում թթվածնի փոխանակման գործընթացից, սատուրացիան սկսում է անկում ապրել: Ինչքան սատուրացիան ցածր է, այնքան թոքային հյուսվածքի ախտահարման ծավալը մեծ է, և պացիենտի վիճակը ծանր է:
Հենց սատուրացիան բարձրացնելու համար են բժիշկները պացիենտներին թթվածնաթերապիա անում` սկզբում սովորական դիմակով շնչացնելով, իսկ ավելի ծանր դեպքերում՝ թոքերի ոչ-ինվազիվ և ինվազիվ արհեստական օդափոխությանը միացնելով:
Այս ցուցանիշը մեր բոլոր պացիենտների մոտ օրական մի քանի անգամ չափվում է, որպեսզի որոշվի առողջական վիճակի փոփոխության ուղղությունը` բարելավում կամ վատթարացում և համապատասխան միջամտություններ կատարվեն։
Հ. Գ. բարեբախտաբար ինձ մոտ թթվածնի սատուրացիան դեռ 98% է»,-գրել է նախարարը և հավելել #ՊահպանեքԿանոնները #ԱռողջԵղեք հեշթեգները: