ԵՐԵՎԱՆ, ՄԱՅԻՍԻ 25, 24News
«Այո, կորոնավիրուսային վարակի տարածման դեմ պայքարում որոշակի հաջողություններ են գրանցվել, բայց մենք հիշում ենք, որ այս վարակը ներկրվել է արտասահմանից, ուստի նպատակահարմար ենք համարում զերծ մնալ արտասահմանյան տուրիստական ուղևորություններից»,- պարզաբանել է Միշուստինը:
Նրա արձանագրմամբ՝ շատ պետությունների համար թե՛ զբոսաշրջությունից, թե՛ դրան հարակից ճյուղերից ստացվող եկամուտները բավական մեծ են, և արտասահմանյան մի շարք երկրներ արդեն հայտարարում են սահմանափակող միջոցառումների մեղմացման մասին: Սակայն ԱՀԿ-ն համաճարակի զարգացման ռիսկը դեռ բարձր է գնահատում և միջազգային ուղևորությունների սահմանափակումների վերացման հանձնարարականներ չի տվել:
Միշուստինն, իր հերթին, ռուսաստանցիներին խորհուրդ է տվել ամառային արձակուրդներն անցկացնել Ռուսաստանում: «Ավելի անվտանգ է արձակուրդն անցկացնել ձեր երկրում»,- նշել է նա:
Նշենք, որ ՌԴ-ում մեկ օրում կորոնավիրուսի 8946 դեպք է հաստատվել: Մահացել է 92 պացիենտ: Ռուսաստանում, COVID-19 համավարակի տարածումից ի վեր, ընդհանուր առմամաբ հաստատվել է վարակման 353 հազար 427 դեպք, որից ավելի քան 118 հազարն ապաքինվել է, 3633-ը՝ մահացել: