ԵՐԵՎԱՆ, ՀՈՒՆԻՍԻ 6, 24News
«Մեծ քսանյակի» երկրները և հրավիրված պետությունները պարտավորվել են ավելի քան 21 մլրդ դոլար հատկացնել կորոնավիրուսի դեմ պայքարի համար: Այդ մասին ասված Է G20-ի՝ հունիսի 5-ին տարածած հայտարարության մեջ: Հաղորդում է France24-ը:
«G20-ը հրավիրված երկրների հետ համակարգում է COVID-19 համաճարակի դեմ պայքարին աջակցելու գլոբալ ջանքերը։ Այսօրվա դրությամբ, G20-ի անդամ և հրավիրված երկրները պարտավորվել են ավելի քան 21 մլրդ դոլար հատկացնել գլոբալ առողջապահության ֆինանսավորմանն աջակցելու համար», - ասված է հայտարարության մեջ:
Այդ միջոցները կուղղվեն ախտորոշման, պատվաստանյութի ստեղծման, թերապիայի, ինչպես նաև կորոնավիրուսի հետ կապված հետազոտությունների իրականացմանը:
Սաուդյան Արաբիան, որն այժմ նախագահում Է G20-ում, 500 մլն դոլար կհատկացնի այս ծրագրին:
Հիշեցնենք, որ դեռևս մարտին G20-ի երկրները խոստացել էին 5 տրլն դոլար հատկացնել կորոնավիրուսի համաճարակի հետևանքները մեղմելու համար:
--0-- ՍՊ