«Ադրբեջան, Շուշի» նշումը տեխնիկական խնդիր է, «Yandex Map»-ն է սխալ տեղորոշել. պարզաբանում

ԵՐԵՎԱՆ, ՀՈւՆԻՍԻ 11, 24News

ադրբեջան

Տեղեկատվական ստուգման կենտրոնը գրում է, որ, ըստ մամուլում տարածածված փաստաթղթի, «Նորք» ինֆեկցիոն կլինիկական հիվանդանոցը Ռուսաստանից ժամանած արցախաբնակ ՀՀ քաղաքացուն ուղեգրել է մեկուսանալու Շուշիի հիվանդանոցում՝ ուղեգրում նշելով մեկուսացման հասցե՝ Ադրբեջան, Շուշի քաղաք։

«Այս տեղեկատվությունը մամուլում հայտնվեց սոցցանցերից. կցված էր նաև ուղեգրի լուսանկարը։

«Նորք» ինֆեկցիոն կլինիկական հիվանդանոցի տնօրեն Մհեր Դավիդյանցը «Տեղեկատվության ստուգման կենտրոնին» փոխանցեց, որ ուղեգիրը հիվանդանոցը չի տրամադրել։ Հայաստան ժամանած ուղևորներին անմիջապես «Զվարթնոց» օդանավակայանից տեղափոխում են մեկուսացման վայրեր՝ ըստ անհրաժեշտության: Ուղեգրումն իրականացվում է հենց օդանավակայանում։

Ուղեգրման համակարգը ներդրվել է «Էլեկտրոնային առողջապահության ազգային օպերատորի» կողմից ( Armed.am), որի տնօրեն Ավետ Մանուկյանը մեզ հետ զրույցում նշեց՝ համակարգը, որով ուղեգրման ժամանակ կատարվում է քարտեզագրումը, օգտվում է «Yandex Map» քարտեզներից, որն էլ համապատասխան կորդինատի ընտրման արդյունքում նշել է խնդրահարույց հասցեն։

Շատերը, Արցախի Հանրապետություն այցելելիս, նկատած կլինեն, որ «Yandex» կամ «Google» համակարգերում իրենց տեղորոշումը (location) նշվում է որպես Ադրբեջան։ Ընկերության ներկայացուցիչը հայտնեց նաև, որ խնդիրը կարգավորելու համար կատարվում են համակարգային փոփոխություններ»,-նշված է հայտրաարությունում։

Նշենք, որ ավելի վաղ ֆեյսբուքյան էջում Արցախում մեկուսանալու համար բժշկական թերթիկ էր հրապարակվել, որում, սակայն, որպես բնակոթյան վայր գրվում էր «Ադրբեջան, Շուշի»: Բժշկական թերթիկը տրամադրել էր Հայաստանի ԲԿ-ներից մեկը:

--0—LՄ