ԵՐԵՎԱՆ, ՀՈՒՆԻՍԻ 13, 24News
Իրանի Իսլամական Հանրապետության Համադան քաղաքի հայկական Ս. Մարիամ Աստվածածին եկեղեցու հարակից տարածքում բռնկված հրդեհը չի վնասել եկեղեցու պատմական շինությանը: «Արմենպրես»-ի փոխանցմամբ՝ այս մասին հաղորդում է Alikonline.ir-ը, վկայակոչելով ԻՍՆԱ լրատվական գործակալության տվյալները:
Հունիսի 12-ին՝ ժամը 00:14-ին, եկեղեցու հարակից տարածքում հրդեհի բռնկման մասին ահազանգ է ստացել Համադան քաղաքի թիվ 18 հրշեջ կայանը: Դեպքի վայր են մեկնել նույն կայանի աշխատակիցները, ինչպես նաև Համադանի կենտրոնական հրշեջ ծառայության փրկարարները, որոնց էլ հաջողվել է մեկուսացնել բռնկված հրդեհը՝ 1 ժամ տևողությամբ հրդեհաշիջման աշխատանքներից հետո:
ԻՍՆԱ-ի հաղորդմամբ՝ հրդեհաշիջման աշխատանքների սահուն իրականացումը, և դրա արդյունքում պատմական շինությանը վնասներ չհասցվելու փաստը պայմանավորված է փրկարարական թիմերի արագ արձագանքման և գործողությունների հրատապ կազմակերպման իրողությամբ:
Միջադեպի հետևանքով տուժածներ չկան, իսկ հրդեհի առաջացման պատճառը հարակից խոտածածկ տարածքներում բռնկված հրդեհն է եղել, որն էլ տարածվել է՝ հասնելով եկեղեցու շինությանը, որի արդյունքում մասամբ այրվել է եկեղեցու ֆասադը, սակայն ոչ պատմական շինությունը:
--0-- ՍՊ