ԵՐԵՎԱՆ, ՆՈՅԵՄԲԵՐ 13, 24News
Եկող տարվա պետական բյուջեն մերերկրի պարտքը կայունացնելու միտում ունի, վարկերի սպասարկման համար կհատկացվի 357 մլրդ դրամ, պարտքի տոկոսը կնվազի։ Այդ մասին այսօր՝ նոյեմբերի 13-ին, 2019-ի բյուջեն ներկայացնելիս ասաց ֆինանսների նախարարի պաշտոնակատար Ատոմ Ջանջուղազյանը:
Նա նշեց, որ 2018-ի առաջին կիսամյակի տվյալներով ՀՆԱ աճի ցուցանիշը եղել է 8,3 տոկոս, սակայն 9 ամսվա կտրվածքով ավելի վատ պատկեր ունենք, քանի որ գյուղատնտեսությունը բյուջեի ցուցանիշների վրա մեծ ազդեցություն չի ունեցել։
«Կանխատեսված էր, որ ՀՆԱ-ի աճը կկազմի 4,5 տոկոս, սակայն վերանայվեց այդ ցուցանիշը և կանխատեսվեց, որ այն կկազմի 6,5 տոկոս։ Հիմա, սակայն, կրկին վերանայում է տեղի ունեցել և կանխատեսվում է, որ աճը կլինի 5-6 տոկոսի սահմաններում: 2019-ի համար էլ համար կանխատեսվում է 4,9 տոկոս տնտեսական աճ»,- ասաց Ջանջուղազյանը:
Նախարարի պաշտոնակատարի փոխանցմամբ, Հարկեր/ՀՆԱ հարաբերակցությունը 2018-ին կկազմի 20,3 տոկոս, իսկ 2019-ին՝ 20,7 տոկոս: «Հարկային եկամուտները 2019-ին կկազմեն 1 տրլն 399 մլրդ դրամ, պաշտոնական դրամաշնորհները՝ 39 մլրդ դրամ եւ այլ եկամուտները՝ 25,4 մլրդ դրամ: Բյուջեի դեֆիցիտը 2019-ին կանխատեսվում է, որ կլինի 151,5 մլրդ դրամ, որից ներքին աղբյուրների հաշվին կֆինանսավորվի միայն 54 մլն դրամը, մնացածը՝ արտաքին միջոցների հաշվին: 2019-ին կանխատեսվում է 241 մլրդ դրամի վարկերի ստացում, իսկ մարումը՝ 85 մլրդ դրամ»,-ասաց Ջանջուղազյանը:
Ֆինանսների նախարարի պաշտոնակատարն ասաց, որ 2019-ին պետական պարտքը կկազմի 6 մլրդ 950 մլն դոլար։