Նոր Արեշում կատարված երկու երիտասարդի դանակահարությունը բացահայտվել է

ԵՐԵՎԱՆ, ՕԳՈՍՏՈՍԻ 3, 24News 

Հուլիսի 25-ին, կեսգիշերին մոտ, ոստիկանության Էրեբունու բաժնում հիվանդանոցից հաղորդում էր ստացվել, որ կրծքավանդակի կտրած-ծակած վերքերով երկու երիտասարդ են բուժօգնության տեղափոխվել: Նրանց դանակահարել էին:

Օպերատիվ խումբը մեկնեց հիվանդանոց: Իրավապահները կազմեցին անհրաժեշտ արձանագրություններ, զրուցեցին բժշկի հետ: Տուժողներն ի վիճակի չէին բացատրություն տալու:
Դեպքի առթիվ հարուցվեց քրեական գործ: Նշանակվեցին դատաբժշկական փորձաքննություններ:
Բացահայտման աշխատանքներին միացան ոստիկանության Երևան քաղաքի վարչության ծառայողները: Եվ համագործակցությունը հաղորդումից օրեր անց դրական արդյունք տվեց:

Ոստիկանները պարզեցին, որ տուժողներին Ազատամարտիկների փողոցի 3-րդ նրբանքի և Նոր Արեշի 34-րդ փողոցի հատման մասում, կենցաղային հարցերի շուրջ վիճաբանության ժամանակ, դանակահարել էր Նոր Արեշի 23-ամյա մի բնակիչ:
Իրավապահների բացատրական աշխատանքի արդյունքում հուլիսի 30-ին կասկածվողը ներկայացավ նախաքննական մարմնին և ձերբակալվեց:

Նրան մեղադրանք է առաջադրվել: Խափանման միջոց է ընտրվել կալանավորումը:
Նախաքննությունը շարունակվում է:

--0--ԿԿ