ԵՐԵՎԱՆ, ՆՈՅԵՄԲԵՐ 15, 24News
«Ժողովուրդ» թերթը գրում է․ «ՀՀ արդարադատության նախարարությունն ի վերջո որոշել է զբաղվել քրեակատարողական հիմնարկների խնդիրների լուծմամբ: «Ժողովուրդ» օրաթերթը տեղեկացավ, որ ԱՆ-ն ՔԿՀ-ներում վերանորոգման աշխատանքներ իրականացնելու նպատակով կծախսի 270 մլն 858 հազար 300 դրամ: Միայն «Նուբարաշեն» ՔԿՀ-ի էլեկտրալուսավորության ցանցերի կապիտալ վերանորոգման համար կհատկացվի 58 մլն 451 հազար դրամ, արտաքին և ներքին ջրամատակարարման ցանցի և ներքին ջրահեռացման համակարգի վերանորոգման համար՝ 34 մլն 82 հազար դրամ:
Արդարադատության նախարարությունը գումար նախատեսել է նաև «Նուբարաշեն» ՔԿՀ-ի ճաշարանը վերանորոգելու համար՝ ավելի քան 17.6 մլն դրամ: Իսկ սանհանգույցների և բաղնիքների կապիտալ վերանորոգման համար կծախսվի 65 մլն 265 հազար դրամ: Նաև «Վարդաշեն» ՔԿՀ-ի արտաքին պարիսպ կկառուցվի՝ 143 մետր երկարությամբ, որի համար կծախսվի ավելի քան 36.8 մլն դրամ: Նույն ՔԿՀ-ում կոյուղու ցանցի կառուցման համար կտրամադրվի 26.2 մլն դրամ, իսկ ահա «Սևան» ՔԿՀ-ի արտաքին ջրահեռացման ցանցի կառուցման համար՝ 32,3 մլն դրամ:
Հուսանք՝ այս գումարներն իսկապես կծառայեն իրենց նպատակին:
Հիշեցնենք, որ «Նուբարաշեն» ՔԿՀ կոյուղու վատ վիճակը Երևանի նախկին ավագանու նիստում մեծ միջադեպի պատճառ դարձավ:
Հիշում եք, երբ այս տարվա փետրվարին «Երկիր ծիրանի» խմբակցության կին անդամները, կոյուղաջրով լի տարան ձեռքներին, փորձել էին ավագանու նիստում մոտենալ նախկին քաղաքապետ Տ. Մարգարյանին, ՀՀԿ-ականները հարձակվել էին նրանց վրա, ծեծկռտուք էր եղել: Այդ միջադեպի առթիվ կա հարուցված քրեական գործ, որի նախաքննությունը դեռ ընթանում է»,-գրում է թերթը: