ԵՐԵՎԱՆ, ՆՈՅԵՄԲԵՐ 15, 24News
Տիգրան Ուրիխանյանը գործադիրին օրենսդրական նախաձեռնություն է ներկայացրել, որով առաջարկվում է արգելել համասեռամոլների ամուսնությունները։ Նախագծով առաջարկվում էր «Ընտանեկան օրենսգրքում» ավելացնել կետ, որն արգելում է նույն սեռի անձանց ամուսնությունը։
Կառավարությունը մերժեց այդ առաջարկը՝ պատճառաբանելով, որ օրենքն արդեն իսկ նախատեսում է միայն տղամարդու և կնոջ միջև ամուսնություն։
Մեկնաբանություններից խուսափելու համար Փաշինյանը ևս մեկ անգամ ճշտեց. «Ենթադրենք երկու տղամարդ կամ երկու կին գնում են ԶԱԳՍ ու ասում են՝ մենք ուզում ենք ամուսնանալ: Կա՞ արդյոք որևէ օրենսդրական հնարավորություն, որ նրանց ամուսնությունը կգրանցվի»։
Աշխատանքի և սոցիալական հարցերի փոխնախարար Արսեն Մանուկյանը պատասխանեց, որ ոչ, Սահմանադրությամբ հստակ սահմանվում է, որ ամուսնությունը կնոջ և տղամարդու միջև իրենց կամքի ազատ արտահայտությամբ միասնությունն է և «Ընտանեկան օրենսգրքով» այդ հարցը կարգավորվում է, մասնավորապես՝ 11 հոդվածով արգելվում է ամուսնություն կնքել՝
ա) այն անձանց միջև, որոնցից թեկուզև մեկը գտնվում է օրենքով սահմանված կարգով գրանցված մեկ այլ ամուսնության մեջ,
բ) մերձավոր ազգականների (ուղիղ վերընթաց ու վայրընթաց ազգականների՝ ծնողների ու զավակների, պապի, տատի ու թոռների, ինչպես նաև հարազատ և համահայր կամ համամայր եղբայրների ու քույրերի, մորաքրոջ, հորաքրոջ, հորեղբոր և մորեղբոր զավակների) միջև,
գ) որդեգրողների և որդեգրվածների միջև,
դ) այն անձանց միջև, որոնցից թեկուզև մեկին դատարանը ճանաչել է անգործունակ,
ե) նույն սեռի անձանց միջև:
«Այսինքն՝ այս օրենքի ընդունումը կամ չընդունումը մեր իրականության մեջ որևէ բան չի փոխում»,- հարցրեց Փաշինյանը, փոխնարարը պատասխանեց՝ ոչ։
Սոցիալական հարցերի նախարարի պաշտոնակատարը վստահեցրեց, որ Հայաստանում նման բան լինել չի կարող, օրենքը հստակ սահմանում է, քանի որ ամուսնությունը կնոջ ու տղամարդու միջև կարող է լինել։