Արդարադատության նախարարի տեղակալն ընդունել է Գագարինում ճանապարհը փակած քաղաքացիներին

ԵՐԵՎԱՆ, ՆՈՅԵՄԲԵՐ 20, 24News

Thumbnail

ՀՀ արդարադատության նախարարի տեղակալ Սուրեն Քրմոյանն ընդունել է Երևան-Սևան ավտոճանապարհի՝ Գագարին ավանի վարչական տարածքում երթևեկությունը երկկողմանի դադարեցրած քաղաքացիներին և նրանց հարազատների պաշտպաններին:

Պաշտպանները ներկայացրել են իրենց բողոքը մեկ գործով անցնող 8  կալանավորված անձանց դատական նիստերի՝ իրենց պնդմամբ անհիմն ձգձգման, դատարանի կողմից խափանման միջոց կալանքը գրավով փոխարինելու միջնորդությունը մերժելու և այլ հարցերի  վերաբերյալ:

Նախարարի տեղակալը ներկայացրել է Արդարադատության նախարարության իրավասությունները, աջակցելու հնարավորությունները, նշել, որ նախաքննության փուլում գործադիր իշխանությունը որևէ կերպ միջամտելու իրավասություն չունի, միաժամանակ տեղեկացրել, որ մեղսագրվող հոդվածների վերաբերյալ ունեցած նախնական տվյալների ուսումնասիրության համաձայն, կալանավորված անձինք դատարանի օրինական ուժի մեջ մտած դատավճռից հետո համաներման ակտով ազատ կարձակվեն: Սուրեն Քրմոյանը հորդորել է կալանավորված անձանց հարազատներին գործել միայն իրավական հարթությունում և չդիմել ծայրահեղ քայլերի: 

Հիշեցնենք, որ առավոտյան Երևան-Սևան ավտոճանապարհի Գագարին ավանի վարչական տարածքում, ինչպես արդեն նշել ենք, երթևեկությունը երկկողմանի դադարեցվել է։ 

Գագարին ավանի բնակչները՝ ի նշան բողոքի, փակել են ճանապարհը և սպառնում են նույնիսկ ինքնահրկիզվել։ Նրանք պահանջում են արդարադատության նախարարի պաշտոնակատար Արտակ Զեյնալյանի հետ հանդիպում, քանի որ բողոքում են ոստիկանությունից և քննչական ապարատից։