ԵՐԵՎԱՆ, ՍԵՊՏԵՄԲԵՐԻ 28, 24News
Սպիտակ տան պաշտոնական կայքէջում ԼՂ-ի դեմ ադրբեջանական ագրեսիայի վերաբերյալ խնդրագիր է ներկայացվել, որն ԱՄՆ Կոնգրեսին կոչ է անում դատապարտել Թուրքիային ու Ադրբեջանին Հայաստանի դեմ ծավածված հանցագործությունների համար:
«Հայաստանը և Արցախն այս պահին Թուրքիայի և Ադրբեջանի հարձակման ու ագրեսիայի տակ են: Այս երկու երկրներն էլ հայերին ու նրանց երկիրը ոչնչացնելու, ավերելու հստակ մտադրություններն են հնչեցրել:
Մենք՝ ամերիկահայերս, լիարժեք կանգնած ենք Հայաստանի կողքին և Կոնգրեսին կոչ ենք անում դատապարտել Ադրբեջանին իր ագրեսիայի, Հայաստանի դեմ իրականացրած հանցագործությունների, իսկ Թուրքիային՝ դրան ներգրավվելու համար»,- նշվում է խնդրագրում:
Կոնգրեսից պաշտոնական պատասխան ստանալու համար անհրաժեշտ է, որ 30 օրվա ընթացքում առնվազն 100 000 մարդ ստորագրի խնդրագիրը:
Խնդրագիրը կարող եք ստորագրել այստեղ:
Հիշեցնենք, որ սեպտեմբերի 27-ի վաղ առավոտյան ադրբեջանական կողմը, խախտելով բոլոր հնարավոր միջազգային պայմանավորվածությունները, թուրքական բանակի գործուն աջակցությամբ անցել է հարձակման Արցախի հետ շփման գծի ամբողջ երկայնքով՝ կիրառելով իր ձեռքի տակ եղած սպառազինության բոլոր տեսակները՝ այդ թվում և օդուժ։ Ադրբեջանական բանակը գնդակոծել է նաև Հայաստանի Հանրապետության պետական սահմանը։
Հայկական զինուժը համառ մարտերից հետո կարողացել է ձախողել հակառակորդի հիմնական նպատակները ու շարունակում է զարգացնել հաջողությունները թշնամուն հետ շպրտելու համար։
--00—ԼՄ