ԵՐԵՎԱՆ, ՀՈԿՏԵՄԲԵՐԻ 13, 24News
Աննա Հակոբյանը ֆեյսբուքյան էջում գրառում է արել.
«Երբ ամեն զանգից վեր ես թռչում, սրտիդ աշխատանքն արագանում է, ծնկներդ ծալվում են, աչքերիդ առաջ մթնում է, ուսերիդ ծանրությունից ողնաշարդ չես կարողանում ուղիղ պահել, ուզում ես ավելի շուտ հողի տակ անցնել, բայց հանկարծ այդ զանգը քեզ քո զինվոր որդու մասին վատ լուր չբերի կամ ասում ես՝ Աստվա՛ծ իմ, գոնե վիրավորված լինի։
Նույն պահին մտածում ես մյուս ձագերի մասին, որոց ոչ թե անձամբ դու ես կաթ տվել, փայափայել ու մեծացրել, այլ քո նման մեկը։
Մենք՝ բոլոր հայ մայրերս, քիչ-քիչ մահանում ենք մեր ամեն մի հերոս զինվորի, բայց մեր սրտում՝ մեր «ձագի, գառնուկի» հետ միասին։
Որդի կորցրած մայրը մահանում է իր բալի հետ միասին, պարզապես դա ֆիզիկապես արձանագրվում է ինչ-որ մի օր, ինչ-որ մի պահի։
Մեզ՝ մայրերիս համար, սա դժոխք է։
Բայց մենք ո՛չ հայրենիք և ո՛չ էլ արժանապատվություն չունե՛նք թշնամիներին տալու։
Հայ ժողովուրդը այլև երբե՛ք չի ցեղասպանվելու։
Հայ մայրը անցնելու է դժոխքի միջով, բայց իր որդուն անարժանապատիվ նահանջի չի՛ դրդելու։
#հզոր։
#անպարտելի
#հաղթանակած»,-գրել է Աննա Հակոբյանը:
Նշենք, որ ՀՀ վարչապետ Նիկոլ Փաշինյանի՝ 1 տարվա ընթացքում զորացրվածների շրջանակում կամավորներ հավաքելու հայտարարությունից հետո նրա որդին՝ Աշոտ Փաշինյանը, կամավորագրվեց:
--00—ԼՄ