Շվեդ նախարարը Չավուշօղլուին քննադատել է կարծիքների արտահայտումը սահմանափակելու համար

ԵՐԵՎԱՆ,  ՀՈԿՏԵՄԲԵՐԻ 14,  24News 

Շվեդ

Շվեդիայի արտաքին գործերի նախարար Ան Լինդեն Թուրքիայի արտգործնախարար Մևլութ Չավուշօղլուին մեղադրել է Թուրքիայում կարծիքների արտահայտման ազատությունը սահմանափակելու մեջ: «Արմենպրես»-ի փոխանցմամբ, ինչպես հայտնում է Associated Press գործակալությունը, միջադեպը տեղի է ունեցել Անկարայում, նախարարների համատեղ մամուլի ասուլիսի ընթացքում:

Ասուլիսի ժամանակ Չավուշօղլուն հանդիմանել է շվեդ նախարարին այն բանի համար, որ նա Թուրքիային կոչ է արել դուրս բերել զորքերը Սիրիայից: Թուրքիայի ԱԳ նախարարը Շվեդիային մեղադրել է քուրդ զինյալներին աջակցելու, ինչպես նաև Հունաստանի կողմից միգրանտների նկատմամբ ենթադրյալ «դաժան վերաբերմունքի» կապակցությամբ լռելու մեջ (Հունաստանը հերքում է այս պնդումը):

«Ես ուզում եմ հարցնել` ո՞ւմ անունից եք Թուրքիային կոչ անում հեռանալ Սիրիայից, թե՞ զգուշացնում եք Թուրքիային: Եթե այդքան զգայուն եք մարդու իրավունքների նկատմամբ, ինչո՞ւ գոնե մեկ անգամ չեք քննադատում Հունաստանին»,- հարցրել է Չավուշօղլուն:

Ի պատասխան, Շվեդիայի ԱԳ նախարարը նշել է, որ հյուր է և չի ցանկանա բանավեճի բռնվել:

«Ես պարզապես հույս ունեմ, որ Թուրքիայում բոլորը հնարավորություն կունենան իրենց կարծիքներն արտահայտել այնպես, ինչպես դուք եք դա անում, նախարար»,- նշել է Լինդեն:

Լրատվամիջոցը հայտնում է, որ Շվեդիայի ԱԳ նախարարի նկատառումը նուրբ քողարկված հղում էր Թուրքիայում խիստ քննադատողական կարծիքի արտահայտման ազատության սահմանափակմանը՝ ներառյալ տասնյակ լրագրողների և քրդամետ քաղաքական գործիչների բանտարկությունը։

Սեպտեմբերի 27-ի վաղ առավոտյան Ադրբեջանը, խախտելով բոլոր միջազգային պարտավորվածությունները, թուրքական բանակի և Մերձավոր Արևելքից բերված ահաբեկիչների անմիջական մասնակցությամբ հարձակում է գործել Արցախի ուղղությամբ։ Այդ ընթացքում բազմիցս հրետակոծվել են թե՛ Արցախի և թե՛ Հայաստանի բնակավայրերը, խաղաղ բնակչության շրջանում կան բազմաթիվ զոհեր ու վիրավորներ, ավերվել են տասնյակ շինություններ, ահռելի վնաս է հասցվել քաղաքացիական ենթակառուցվածքներին։

Հայկական Զինված ուժերը հերոսական ու համառ մարտեր են մղում հակառակորդի դեմ՝ պատճառելով նրան կենդանի ուժի և տեխնիկայի ծանրագույն կորուստներ։

Աղբյուրը՝ «Արմենպրես»։ 

--00—ՄՀ