ԵՐԵՎԱՆ, ԴԵԿՏԵՄԲԵՐ 5, 24News
Թուրքիայում նախագահ Աբդուլլահ Գյուլի նախկին խորհրդական Ահմեդ Սևերին դատի են տվել նախագահ Էրդողանին վիրավորելու համար։ Այս մասին տեղեկացնում է T24 կայքը:
Սևերին մեղադրվում է «Թող ներսումս չմնա. վկայությունս է» գրքում Էրդողանի մասին անթույլատրելի տեղեկություններ ու արտահայտություններ օգտագործելու համար: Գյուլի նախկին խորհրդականի դեմ գործը հարուցվել է նախագահ Էրդողանի բողոքի հիման վրա:
Գործի առնչությամբ հարցաքննության կանչված Սևերը դատախազություն չի ներկայացել և դատախազի հարցերին պատասխանել է գրավոր:
Հիշեցնենք, որ Թուրքիայում «երկրի նախագահին վիրավորելու» մասին հոդվածով դատարանի առաջ են կանգնել բազմաթիվ մտավորականներ, լրագրողներ, ընդդիմադիր գործիչներ ու անգամ հասարակ քաղաքացիներ, սակայն սա առաջին դեպքն է, երբ տվյալ մեղադրանքով դատական գործ է բացվում նախկին նախագահներից մեկի աշխատակազմի անդամի դեմ: