ԵՐԵՎԱՆ, ՀՈւՆՎԱՐԻ 29, 24News
Չտրվե՛նք նաիրիհունանյանական հույզերին։ Ծայրահեղ ծանր վիճակում ենք, բայց դա որևէ մեկին իրավունք չի տալիս երկրի քաղաքական ղեկավարության ոչնչացնելու անհրաժեշտության մասին խոսել։ Այս մասին 24TV-ի «Հարցազրույց» հաղորդման եթերում ասել է «Արդար Հայաստան» հանրային նախաձեռնության անդամ, փաստաբան Նորայր Նորիկյանը՝ մեկնաբանելով Արցախի «Միացյալ Հայաստան» կուսակցության առաջնորդ Վահան Բադասյանի՝ Նիկոլ Փաշինյանին ֆիզիկապես ոչնչացնելու հայտարարությունը։
Նրա գնահատմամբ՝ կոչը ծայրահեղ վտանգավոր է, և իրավապահ մարմինները լրջագույնս պետք է զբաղվեն դրանով։
Անդրադառնալով արմատական ընդդիմության պնդումներին, թե ժողովրդի մեջ օրեցօր ավելացող ցասումը կարող է վենդետաների հանգեցնել, փաստաբանը նկատել է․
«Ժողովուրդը կարող է մի օր իր ցասմամբ մաքրել բոլոր նրանց, ովքեր այս տարիներին ապականել են երկիրը, բայց նրանք ահաբեկչությամբ, տեռորով չեն անելու դա։
Որևէ մեկի մտքով չանցնի, որ կարելի է ավտոմատով հարց լուծել։ Ժողովուրդը չի կարող զբաղվել ահաբեկչությամբ։ Նրա ցասումը խաղաղ է դրսևորվում։ Դա չի կարող լինել ավտոմատով և ահաբեկչությամբ»,- ասել է նա։
Մանրամասները՝ տեսանյութում։
--0--ԿԿ