ԵՐԵՎԱՆ, ՄԱՐՏԻ 22, 24News
Արտահերթ ընտրությունները պետք են, որ եղած ճգնաժամից դուրս գանք, իսկ Ընտրական նոր օրենսգրքով ընտրություն անցկացնելու դեպքում նոր ճգնաժամ կստեղծվի: Այս մասին ֆեյսբուքյան ուղիղ եթերում հայտարարել է «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Ընտրական օրենսգրքի փոփոխություններին:
«Մենք ասել ենք` եթե Օրենսգիրքը փոխվի էլ, ընտրություններին մեր մասնակցութան որոշումը չի փոխվելու, բայց խաղի ընթացքում խաղի կանոնները չի կարելի փոխել: Այս օրենսգիրքն ամբողջությամբ հում է, մենք առաջարկում ենք՝ այս հում օրենսգիրքը հիմա չընդունվի, դրանով չգնանք արտահերթ ընտրությունների»,- նշել է նա:
Մարուքյանի խոսքով` ընտրության օրը հայտարարվել է գործող խաղի կանոնների լույսի ներքո, իսկ նոր խաղի կանոններ ընդունելը նշանակում է ընտրության օրը կասկածի տակ դնել, ճգնաժամը խորացնել երկրում, հետևաբար` ճգնաժամը լուծելու կամքը կորչում է:
Ըստ պատգամավորի` այս ընտրությունների յուրաքանչյուր ուժ կունենա միջինը մինչև 30, մեծ ուժերը` 50 տեղ. սակայն նա այս ընտրություններում չի տեսնում, որ որևէ ուժ անգամ 40 տոկոս հավաքելու հնարավորություն ունի:
«Ժողովուրդը կուսակցություն է ընտրելու՝ լիդերի համար, սակայն լինելու են պատգամավորներ, որոնց ժողովուրդը չի ընտրում: Այսինքն՝ ժողովուրդն ընտրելու է լիդերի կամ եռյակի, բայց ընտրվելու են մարդիկ, որ չէին ընտրվի, եթե ժողովրդի դատի առաջ կանգնեին: Սրա մասին շատ է խոսվել, որ հանրությանը անհայտ մարդիկ դառնում են պատգամավոր»,- ասել է Մարուքյանը:
--00--ԱԹ