ՀՀ-ում գործում են Ադրբեջանի տեղեկատվական պայքարի գործակալներ,հուշում են՝ որտեղից ներխուժել

ԵՐԵՎԱՆ, ՄԱՅԻՍԻ 16, 24News

ՀՀ վարչապետի պաշտոնակատար Նիկոլ Փաշինյանի գլխավորությամբ կառավարությունում հրավիրված Անվտանգության խորհրդի նիստի ժամանակ Նիկոլ Փաշինյանը անդրադարձել է նաև Հայաստանում գործող «պրոադրբեջանական գործունեություն ծացալող ուժերին»:

«Չնայած իմ կոչերին՝ ստեղծված իրավիճակը ներքաղաքական շահարկումների առարկա չդարձնելու, այնուամենայնիվ կան ուժեր, որոնք, ըստ էության, թիկունքում պրոադրբեջանական, չեմ վախենա այս դիրքորոշումից, գործունեություն են ծավալում:

Ընդհանուր առմանբ գիտեք, որ ռազմաքաղաքական ցանկացած դիմադրություն, ցանկացած պայքար զուգորդվում է տեղեկատվական պայքարով և հիմա ինձ համար ակնհայտ է, որ Հայաստանի Հանրապետությունում գործում են Ադրբեջանի տեղեկատվական պայքարի գործակալներ, նրանց անուն ազգանունները նույնիսկ կարելի է նշել, և այդ մարդիկ 2020 թվականին Ադրբեջանի նախագահին հրավիրում էին հարձակվել Հայաստանի Հանրապետության վրա, այս իրադարձություններից առաջ ցույց էին տալիս մոտավորապես այն տեղանքները, որտեղից կարելի է ներխուժել Հայաստանի Հանրապետության տարածք, և նրանք հիմա նաև Հայաստանի Հանրապետության հանրության շրջանում տարածում են Ադրբեջանի քարոզչական թեզեր ու, ըստ էության, հուշում են, թե ինչպիսի բանակցային դիրքորոշումներ որդեգրի Ադրբեջանը, որպեսզի դրանք առավել նպաստավոր լինեն իրենց քաղաքական պայքարի համար»,-ասել է Փաշինյանը և կարծիք հայտնել, որ այդ ամեն ինչը պատահական լինել չի կարող, և պետք է կարողանալ հանդարտ հետաքննել, հասկանալ՝ ինչ է տեղի ունենում:

--00—ԼՄ