ԵՐԵՎԱՆ, ՀՈՒՆՎԱՐ 11, 24News
«Նոր խորհրդարանում չեմ կարող աշխատել, որովհետև ես ինքս իմ թեկնածությունը ի սկզբանե չեմ դրել, որպեսզի ընտրվեմ պատգամավոր», - լրատվամիջոցների ներկայացուցիչների ընդունելության ժամանակ ասել է ԱԺ նախագահ Արա Բաբլոյանը:
«Կարծում եմ՝ այս դաշտում արեցի այն ամենը, ինչ կարող էի անել, հիմա ավելի լավ է վերադառնամ առողջապահություն, անեմ այն, ինչը շատ լավ եմ անում, ինձ մոտ վիրահատելն ավելի լավ է ստացվում, քան խոսելը»,- ասել է Բաբլոյանը։
Հարցին՝ հետևելո՞ւ է քաղաքական զարգացումներին, Արա Բաբլոյանն ասել է, որ հետևելու է ոչ թե քաղաքականությանը, այլ՝ զարգացմանը, և պատրաստակամություն հայտնել անհրաժեշտության դեպքում օգտակար լինելու խորհրդարանին. «Ես պատրաստ եմ իմ փորձը հաղորդել նոր խորհրդարանին», - ասել է նա։
ԱԺ նախագահը նմանություն է տեսել նաև իր և լրագրողների մասնագիտությունների միջև:
«Մենք ձեզ հետ ինչ-որ տեղ կոլեգաներ ենք ու երբ մարդիկ ունեն հոգեկան խնդիրներ կամ հոգեբանական դժվարություններ, նրանք դիմում են բժիշկներին, որ ստանան օգնություն, իսկ լրագրողները կարող են հոգեկան ու հոգեբանական հանգստություն առաջացնել և հակառակը», - ամփոփել է Բաբլոյանը: