Ոստիկանները բացահայտել են Ուջանում վճարային տերմինալի գողության դեպքը

ԵՐԵՎԱՆ, ՍԵՊՏԵՄԲԵՐԻ 27, 24News

Մարտի լույս 21-ի գիշերը Արագածոտնի մարզի Ուջան գյուղում գողություն էր եղել։

Ոստիկանությունից հայտնում են, որ ժամը 4.30-ից 5.30-ն ընկած ժամանակահատվածում անհայտ անձինք լինգով բացել էին գյուղի խանութներից մեկի դուռն ու գողացել 600 հազար դրամը գերազանցող վճարային տերմինալը, որի մեջ 67 հազար 500 դրամ էր եղել։

Ահազանգով դեպքի վայր մեկնած ոստիկանության Աշտարակի բաժնի օպերատիվ խումբը միջոցառումներ էր ձեռնարկել ոչ միայն հանցագործությունը բացահայտելու, այլև վճարային տերմինալը հայտնաբերելու ուղղությամբ։ Դեպքից ժամեր անց տերմինալը հայտնաբերվել էր Ուջան գյուղից մոտ 1 կիլոմետր հեռավորության վրա՝ դաշտում։ Կատարողներին հայտնաբերել չէր հաջողվել։ Դեպքի առթիվ տարածքային քննչական բաժնում հարուցվել էր քրեական գործ, որի շրջանակներում ձեռնարկված օպերատիվ-հետախուզական միջոցառումները նոր թափ առան օրերս։

Աշտարակի ոստիկաններին հաջողվեց տվյալ ստանալ վճարային տերմինալը հափշտակած անձանց ինքնության վերաբերյալ։ Նրանց հայտնաբերելու միջոցառումներին միացան ոստիկանության Արագածոտնի մարզային վարչության ու Արարատի բաժնի ծառայողները։ Համատեղ աշխատանքի շնորհիվ կասկածվողները՝ Երևանի 24-ամյա բնակիչը և Արարատ քաղաքի 30-ամյա բնակիչը, սեպտեմբերի 24-ին հայտնաբերվեցին ու բերման ենթարկվեցին Աշտարակի բաժին, ապա ներկայացվեցին դեպքի նախաքննությունը վարող մարմնին։ Նրանք տվել են խոստովանական ցուցմունք։ Նախաքննությունը շարունակվում է։

--00--ԱՀ