ԵՐԵՎԱՆ, ՀՈՒՆՎԱՐ 17, 24News
Կենտրոնական ռազմաբժշկական հանձնաժողովում զննում են ոչ բոլոր նորակոչիկներին, որովհետև նախնական զննությունների արդյունքներով նրանք ճանաչվում են ծառայության համար առողջ և պիտանի։ Սակայն կարող են լինել հիվանդություններ, որոնք ի հայտ են գալիս հետագայում՝ ծառայության ընթացքում։ Այս մասին այսօրվա ասուլիսի ժամանակ հայտնեց ՀՀ ՊՆ կենտրոնական ռազմաբժշկական հանձնաժողովի նախագահ Սահակ Օհանյանը։
Նրա խոսքերով՝ այդ է պատճառը, որ հնարավոր չէ բացառել, որ հիվանդություններ ունեցող որոշ երիտասարդներ կարող են զորակոչվել առանց այդ հիվանդությունների մասին տեղեկություն ունենալու։ Սակայն ծառայության հետ անհամատեղելի հիվանդության ի հայտ գալու դեպքում, ըստ Օհանյանի, այդ երիտասարդներն անմիջապես զորացրվելու են։
«Օրինակ, 2018 թվականին 24 ժամկետային զինծառայողի վերաբերյալ Կենտրոնական ռազմաբժշկական հանձնաժողովը կայացրել է որոշում՝ սխալ զորակոչ։ Այսինքն՝ ակնհայտ զորացրվել են այն մարդիկ, այն զինվորները, ովքեր պետք է զինվորական ծառայության չընդգրկվեին։ Լինում են այդպիսի դեպքեր»,- ասաց Օհանյանը։