ԵՐԵՎԱՆ, ՀՈՒՆՎԱՐ 17, 24News
«Էվրենսել» պարբերականը, գրում է, որ Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի՝ Դիարբեքիրից ընտրված պատգամավոր Կարո Փայլանը գրավոր հարցում է հղել երկրի արդարադատության նախարար Աբդուլհամիդ Գյուլին՝ պահանջելով պատասխանել «թրքությունը վիրավորելու» մասին Քրեական օրենսգրքի 301-րդ հոդվածի վերաբերյալ որոշ հարցերի:
Հայազգի պատգամավորը, որն այդ նույն հոդվածի հետևանքով կարող է զրկվել պատգամավորական անձեռնմխելիությունից, հետաքրքրվել է նախարարից, թե ինչ սկզբունքով է նա տրամադրում այդ հոդվածով գործ հարուցելու համապատասխան թույլտվությունը դատարանին, ինչպես նաև քանի նման գործ է հարուցվել Թուրքիայում 2008 թվականից մինչ այսօր, և քանի պատգամավոր է նման կերպ զրկվել անձեռնմխելիությունից:
Հիշեցնենք, որ 2008 թվականից ի վեր 301-րդ հոդվածի հիման վրա հետաքննություն սկսելու համար որպես պարտադիր պայման մտցվել է երկրի արդարադատության նախարարության թույլտվությունը: Նոր որոշումը մեծապես պայմանավորված էր պոլսահայ լրագրող և մտավորական Հրանտ Դինքի դեմ 301-րդ հոդվածով բացված դատական գործի ու դրանից բխող ազգայնական տրամադրությունների՝ հայ գործչի սպանության մեջ ունեցած կարևոր դերով:
Օրերս թուրքական դատախազությունն արդեն Փայլանի վերաբերյալ գործով միջնորդություն է ներկայացրել խորհրդարան՝ նրան անձեռնմխելիությունից զրկելու պահանջով: Հետաքննություն սկսելու համար դատախազությունն արդեն ունի Արդարադատության նախարարության համապատասխան թույլտվությունը:
Հետաքննությունը պայմանավորված է 2018-ի հուլիսին Փայլանի արած հայտարարությամբ այն մասին, որ Դիարբեքիրը, որտեղ ամեն անկյունում կարելի է ջրցան մեքենաներ և զրահատեխնիկա տեսնել, հիշեցնում է «Հիտլերի և Մուսոլինիի ժամանակները»: Միևնույն ժամանակ Դիարբեքիրի իշխանությունները Փայլանի խոսքերը դիտարկել են որպես վիրավորանք թուրքական իշխանությունների հասցեին:
Սա հայազգի պատգամավորին անձեռնմխելիությունից զրկելու առաջին փորձը չէ: