ԵՐԵՎԱՆ, ՀՈԿՏԵՄԲԵՐԻ 20, 24 News
2021թ. հունվար-սեպտեմբեր ամիսների ընթացքում 1000 խոշոր հարկ վճարողների կողմից վճարված գումարները կազմել են ավելի քան 871 մլրդ 241 մլն դրամ: Այս մասին հայտնում են ՊԵԿ տեղեկատվության և հասարակայնության հետ կապերի բաժնից:
Պետական եկամուտների կոմիտեն հայտնում է, որ հարկային մարմնի կողմից հրապարակվել է 2021 թվականի հունվար-սեպտեմբեր ամիսների ընթացքում առաջին 1000 խոշոր հարկ վճարողների կողմից վճարված հարկերի վերաբերյալ տեղեկատվությունը:
1000 խոշոր հարկ վճարողների կողմից 2021թ. 9 ամիսների ընթացքում պետական բյուջե ընդհանուր առմամբ վճարվել է ավելի քան 871 մլրդ 241 մլն դրամ: Հարկային մարմին կատարված վճարումների գումարը կազմել է ավելի քան 733 մլրդ 143 մլն դրամ, իսկ մաքսային մարմին կատարված վճարումների գումարը կազմել է ավելի քան 138 մլրդ 98 մլն դրամ։
1000 խոշոր հարկ վճարողների վերաբերյալ ցանկերը հասանելի են ՊԵԿ պաշտոնական կայքի «Հարկ վճարողների վերաբերյալ տեղեկատվական ցանկեր» բաժնում:
Ցանկը հրապարակվել է հիմք ընդունելով ներկայումս գործող ՀՀ կառավարության որոշմամբ սահմանված չափորոշիչները, մասնավորապես` ցանկում ներառվել են պետական և համայնքային կառավարչական հիմնարկները:
Հաշվի առնելով, որ հարկ վճարողների կողմից վճարվող հարկերի վերաբերյալ տեղեկատվությունը հասանելի է նաև օտարերկրյա ներդրողներին և ներդրումային կազմակերպություններին, իսկ պետական և համայնքային կառավարչական հիմնարկների կողմից վճարվող հարկերը ուղղակիորեն չեն բնութագրում նրանց գործունեության արդյունքները, այլ հանդիսանում են պետական բյուջեով նախատեսված միջոցների վերաբաշխման արդյունք, ուստի ՊԵԿ-ը հանդես է եկել առաջարկությամբ` առաջին 1000 խոշոր հարկ վճարողների ցանկում չներառել ՀՀ պետական և համայնքային կառավարչական հիմնարկները:
ՀՀ կառավարության որոշման մեջ համապատասխան փոփոխություն կատարելուց հետո ՊԵԿ-ի պաշտոնական կայքում կտեղադրվեն համապատասխան ժամանակահատվածների համար` հարկ վճարողների վճարումների վերաբերյալ ցանկերը:
Խոշոր հարկ վճարողների առաջին տասնյակը հետևյալն է (ներկայացված է 30.09.2021 թ. դրությամբ հարկ վճարողների կողմից ՀՀ պետբյուջե վճարված հարկերի և վճարների ընդհանուր գումարը՝ հազ. դրամ)
1. «Գազպրոմ Արմենիա»՝ 38.266.412
2. «Զանգեզուրի պղնձամոլիբդենային կոմբինատ»՝ 38.249.247
3. «ՀՀ պաշտպանության նախարարության աշխատակազմ»՝ 34.194.185
4. «Գրանդ Տոբակո»՝ 24.774.246
5. «Գեոպրոմայնինգ գոլդ»՝ 16.415.197
6. «Ինտերնեյշնլ Մասիս տաբակ»՝ 15.532.586
7. «ՄՏՍ Հայաստան»՝ 13.039.084
8. «Թեղուտ»՝ 12.341.373
9. «Սիփիէս Օիլ»՝ 11.936.923
10. «Ֆլեշ»՝ 10.756.122:
--00--ԱԹ