Արտակ Բեգլարյանը դասախոսությամբ է հանդես եկել Ֆլեթչերի դպրոցում և Հարվարդի համալսարանում

ԵՐԵՎԱՆ, ՆՈՅԵՄԲԵՐԻ 10, 24News

նկար

Արցախի Հանրապետության պետական նախարար Արտակ Բեգլարյանը նոյեմբերի 5-ին և 8-ին հանդես է եկել դասախոսությամբ Ֆլեթչերի իրավունքի ու դիվանագիտության դպրոցում և Հարվարդի համալսարանի մարդու իրավունքների կենտրոնում:

ԱՀ պետական նախարարի աշխատակազմի տեղեկատվության և հասարակայնության հետ կապերի բաժնից հայտնում են, որ որպես ԱՄՆ Թաֆթս համալսարանի Ֆլեթչերի իրավունքի և դիվանագիտության դպրոցի շրջանավարտ՝ պետական նախարարը հրավիրվել էր դիվանագիտության առաջատար այդ համալսարանը՝ դասախոսություն կարդալու ադրբեջանա-ղարաբաղյան հակամարտության աշխարհաքաղաքականության վերաբերյալ: Արտակ Բեգլարյանն ընդգծել է, որ Ադրբեջանն ու Թուրքիան շարունակում են ապակայունացնող վարք դրսևորել տարածաշրջանում՝ պարբերաբար խախտելով նաև Արցախի բնակչության իրավունքները: Պետական նախարարը կարևորել է հակամարտության արդարացի կարգավորումը միջազգային իրավունքի նորմերի, ներառյալ՝ ժողովուրդների ինքնորոշման իրավունքի հիման վրա, որպեսզի հնարավոր լինի կայուն խաղաղություն ապահովել Հարավային Կովկասում:

Պետական նախարարը և իր գլխավոր խորհրդական Դավիթ Հակոբյանը ներկայացրել են լայն տարածաշրջանային ու միջազգային զարգացումների համատեքստում Հարավային Կովկասի զարգացումներն ու առկա միտումները՝ Մերձավոր Արևելքում աճող արմատական խմբավորումներն ու վարքագիծը համարելով համաշխարհային կարգի հանդեպ երկարաժամկետ վտանգ: Նրանք շեշտադրել են, որ Արցախը 2020թ. դարձել է նման մարտահրավերների գլխավոր թիրախներից մեկը, որն, իր մեթոդաբանության ու ահաբեկչական խմբավորումների ընդգրկման պատճառով, հղի է շոշափելի վտանգներով նաև հեռավոր տարածաշրջանների համար:

Հարվարդի համալսարանի մարդու իրավունքների կենտրոնում Արտակ Բեգլարյանը ներկայացրել է 2020թ. պատերազմի ժամանակ և դրա հետևանքով առաջացած մարդու իրավունքների հիմնախնդիրները, ադրբեջանական ոճրագործությունները հայ ժողովրդի հանդեպ: Նա կարևորել է միջազգային գիտահետազոտական շրջանակների պատշաճ ուշադրության անհրաժեշտությունը կատարված վայրագությունների նկատմամբ, ինչը կարող է կանխարգելիչ նշանակություն ունենալ տարածաշրջանում և աշխարհի այլ հատվածներում մարդու իրավունքների նմանատիպ խախտումների համար:

--00—ԼՄ