ԵՐԵՎԱՆ, ՀՈՒՆՎԱՐԻ 11, 24 News
ՀՀ նախկին գլխավոր դատախազ, ՀՀ ՔԿ նախկին նախագահ Աղվան Հովսեփյանի կողմից ներկայացված հանցագործության մասին հաղորդման հիման վրա քրեական գործի հարուցումը մերժվել է՝ հանցակազմի բացակայության հիմքով։ Այս մասին «Փաստինֆո»-ի հետ զրույցում հայտնեցին ՀՀ ոստիկանության Հասարակայնության հետ կապերի և լրատվության վարչությունից։
Հիշեցնենք, որ լրատվական մի կայքի կողմից, որը չունի կոնտակտային որեւէ տվյալ, հեռախոսահամար, խմբագիր, մտացածին տեղեկություններ պարունակող հրապարակում է տարածել՝ Ա.Հովսեփյանին մեղադրելով մարդու սեռական անձեռնմխելիության ու կյանքի դեմ առերեւույթ արարքներ կատարելու մեջ։ Այդ կապակցությամբ Աղվան Հովսեփյանը հաղորդում է ներկայացրել ՀՀ գլխավոր դատախազություն՝ պահանջելով քրեական գործ հարուցել լրատվական կայքի կողմից իրեն վերագրվող առանձնապես կեղծ մեղադրանքներ պարունակող հրապարակման առթիվ ու պատասխանատվության ենթարկել սուտ մատնության հեղինակներին։ Դատախազությունը հաղորդումն ուղարկել էր ՀՀ ոստիկանություն՝ ստուգման և ընթացքը որոշելու հանձնարարությամբ։
ՀՀ ոստիկանությունում քննության առարկա է դարձվել բուն հրապարակումը՝ պարզելու, թե նման դեպք եղել է, թե ոչ, արդյունքում հաստատել են, որ նման լրատվական կայքի կողմից տարածվածը իրականության հետ որեւէ աղերս չունի ու քրեական գործի հարուցումը մերժվել է՝ հանցադեպի բացակայության հիմքով։ Սակայն մերժվել է նաեւ քրեական գործի հարուցումը սուտ մատնության հատկանիշներով՝ պատճառաբանելով, թե բացակայում է հանցակազմը։
Ըստ ոստիկանության՝ կարելի է մարդուն զրպարտել ու մեղադրել սպանություն կատարելու մեջ ու չենթարկվել պատասխանատվության, բայց պատրաստ են անանուն նամակների հիման վրա քրեական գործ հարուցել, իբր, Փաշինյանին վիրավորելու համար՝ ի հեճուկս ՀՀ քրեական դատավարության օրենսգրքի։
«Փաստինֆո»-ն կապ հաստատեց նաև Աղվան Հովսեփյանի փաստաբանական խմբի անդամ Գագիկ Խաչիկյանի հետ՝ պարզելու, թե արդյո՞ք պատրաստվում են վիճարկել սուտ մատնության հատկանիշներով քրեական գործի հարուցումը մերժելու մասին որոշումը, ինչին ի պատասխան Խաչիկյանը տեղեկացրեց, որ քննարկվում է՝ բողոք ներկայացնելու հարցը։
--00—ՄՀ