Պետդուման դիմել է Պուտինին՝ խնդրելով ճանաչել Դոնեցկի և Լուգանսկի հանրապետությունների անկախությունը

ԵՐԵՎԱՆ, ՓԵՏՐՎԱՐԻ 15, 24News

Աշխարհ

Ռուսաստանի Դաշնության խորհրդարանը՝ Պետական դուման, երեքշաբթի տեղի ունեցած պատգամավորների մեծամասնությամբ կողմ քվեարկությամբ դիմել է նախագահ Վլադիմիր Պուտինին՝ առաջարկելով ճանաչել Դոնեցկի և Լուգանսկի հանրապետությունները։ Այս մասին հայտնում է ՏԱՍՍ գործակալությունը։ 

Նման օրինագիծ Պետդումայի օրակարգ էր մտել Կոմունիստական կուսակցության խմբակցության առաջարկով։ 

Հիշեցնենք, որ Ուկրաինայի և Ռուսաստանի միջև հարաբերությունները շարունակում են ծայրահեղ լարված մնալ։ Արևմտյան երկրներն ու Կիևը միաբերան պնդում են, որ Մոսկվան ռազմական գործողություններ է նախապատրաստում ընդդեմ Ուկրաինայի։

ՌԴ-ում, սակայն, կտրականապես հերքում են այդ հայտարարությունները՝ նշելով, որ Արևմուտքը զբաղված է տեղեկատվական ահաբեկչությամբ, հավելելով, որ պաշտոնական Կիևն է նախապատրաստում ռազմական գործողություններ Դոնբասում՝ ընդդեմ Դոնեցկի և Լուգանսկի չճանաչված հանրապետությունների։ 

Վերջին մի քանի օրվա ընթացքում արևմտյան մի շարք երկրներ՝ այդ թվում և ԱՄՆ-ն, կոչ են արել իրենց քաղաքացիներին անմիջապես լքել Ուկրաինայի տարածքը, ինչպես նաև էվակուացրել են տեղում աշխատող դիվանագետների մեծ մասին և նրանց ընտանիքներին։

--00--ԿԿ