ԵՐԵՎԱՆ, ԱՊՐԻԼԻ 1, 24News
Ռուսաստանի Պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովը հաստատել է, որ ապրիլի 1-ի առավոտյան Ուկրաինայի ռազմաօդային ուժերի երկու ուղղաթիռ մտել է ռուսական օդային տարածք և հրթիռակոծել Բելգորոդում գտնվող նավթային բազան: Ինչպես տեղեկացնում է «Արմենպրես»-ը, այս մասին հայտնել է «Russia Today»-ը:
«Ապրիլի 1-ին ՝ ժամը 05:00-ի սահմաններում, երկու ուկրաինական ՄԻ-24 ուղղաթիռ չափազանց փոքր բարձրության վրա մտել է Ռուսաստանի Դաշնության օդային տարածք: Ուկրաինական ուղղաթիռները հրթիռային հարված են հասցրել Բելգորոդի ծայրամասում գտնվող նավթամթերքի պահպանման քաղաքացիական օբյեկտին: Հրթիռների հարվածների հետեւանքով առանձին պահեստներ վնասվել և այրվել են», - հայտարարել է Կոնաշենկովը ։
Նա ընդգծել է, որ նավթաբազան կապ չունի ռուսական զինված ուժերի հետ։
Ուկրաինայի պաշտպանության նախարարության ներկայացուցիչ Ալեքսանդր Մոտուզյանիկը չի հաստատել կամ հերքել Բելգորոդի նավթաբազայի բռնկված հրդեհի հետ Ուկրաինայի առնչությունը:
--00--ՀԱ