ԵՐԵՎԱՆ, ՓԵՏՐՎԱՐԻ 16, 24News
Արցախի «Ազատ հայրենիք» կուսակցության նախագահ Արայիկ Հարությունյանն իր ֆեյսբուքյան էջում գրել է, որ Արցախում 2020 թվականին կայանալիք համապետական ընտրությունների հետ կապված իր անունը շահարկվելը որակում է որպես սադրանք։ Գրառումը՝ ստորև․
«Հարգելի ՛ հայրենակիցներ, այս օրերին օնլայն հարթակներում կազմակերպվող քվեարկություններն ու տարաբնույթ հայտարարությունները՝ կապված 2020 թվականին մեր հանրապետությունում կայանալիք համապետական ընտրությունների հետ, որտեղ շահարկվում է իմ անունը, որակում եմ որպես սադրանք։
Մենք արդեն մամուլի միջոցով տեղեկացրել ենք հանրությանը, որ ընթացիկ տարում «Ազատ հայրենիք» կուսակցությունը համագումար կանցկացնի, որտեղ պաշտոնապես կհաստատվի սպասվող նախագահական ընտրություններին մեր կողմից առաջադրվող թեկնածուի անունը։
Ուստի իմ կուսակցական ընկերներին, համակիրներին կոչ եմ անում այսուհետ չտրվել և չարձագանքել նման սադրիչ գործողություններին, ինչպես նաև մեզ հասցեագրված բամբասանք ու հերյուրանք պարունակող նյութերին, որոնցով որոշ ուժեր փորձում են «հեղեղել» համացանցը։ Ամեն ինչին ժամանակին կտրվեն հիմնավոր պատասխաններ: Իսկ այս օրերին մեր երկրի առաջ ծառացած խնդիրների լուծման գործում ավելի մեծ անելիքներ ունենք»: