ԵՐԵՎԱՆ, ՓԵՏՐՎԱՐԻ 16, 24News
Արցախի անվտանգության խորհրդի քարտուղար, Արցախի հերոս Վիտալի Բալասանյանը դեռևս հստակ որոշում չի կայացրել` 2020 թվականին որպես թեկնածու առաջադրվելո՞ւ է Արցախում նախագահի ընտրությանը, թե՞`ոչ: Այդ մասին նա ասաց 24News.am- ի հետ զրույցում:
«Ես Արցախի առաջին գումարման Գերագույն խորհրդի պատգամավոր եմ եղել և, միաժամանակ, Ասկերանի պաշտպանական շրջանի հրամանատարը: Այնուհետև, երբ օրենքի փոփոխության արդյունքում զինվորականներին իրավունք չէր վերապահվում զբաղվել նաև քաղաքականությամբ, 2005 թվականից` զորացրվելուց հետո, մտել եմ ակտիվ քաղաքականություն և եղել 4-րդ, 5-րդ և 6-րդ գումարման ԱԺ պատգամավոր: 2012 թվականին թեկնածությունս առաջադրել եմ նախագահական ընտրություններին և լուրջ ցուցանիշ ապահովել», - պարզաբանեց Բալասանյանը:
Նրա խոսքով՝ որոշել է սկսել կոնսուլտացիաներ խորհրդարանական և արտախորհրդարանական ուժերի, ինչպես նաև հասարակական ակտիվ գործիչների և կազմակերպությունների հետ: Երբ նրանք համամիտ կլինեն Բալասանյանի մտահղացումներին, այն ժամանակ էլ որոշում կկայացնի։
Անդրադառնալով ՊԲ նախկին հրամանատար Սամվել Բաբայանի` Արցախի նախագահի թեկնածու առաջադրվելու մտադրությանը, Բալասանյանը նշեց, որ վերջինս պատահական մարդ չէ Արցախի համար, և բավականին լուրջ ճանապարհ ունի անցած ժողովրդի հետ:
«Ինձ համար ցավալի է, որ ոչ միայն Սամվել Բաբայանը, այլ նաև ուրիշներ, վերջին տարիներին Արցախում չեն եղել: Դա իր (Սամվել Բաբայանի- խմբ.) անձնական ընտրությունն է, բայց լավ կլիներ, որ ծառայությունից հետո մնար Արցախում: Ինչ վերաբերում է ստորագրահավաքի միջոցով սահմանադրական փոփոխության հասնելուն, որպեսզի նախագահի թեկնածու առաջադրվելը հնարավոր լինի, ապա դա ժողովրդի որոշելիքն է`Սահմանադրության համապատասխան»,- ասաց Բալասանյանը:
Նա նշեց, սակայն, որ լուրջ չի ընդունում մեկ անձի համար, մեկ կետի հարցով սահմանադրական փոփոխություն անելը, քանի որ, ըստ Բալասանյանի, սահմանադրական փոփոխությունն իրենից մի ամբողջ փաթեթ պետք է ներկայացնի: Միևնույն ժամանակ, նա նաև ընդգծեց, որ Արցախի նոր սահմանադրության մեջ լուրջ փոփոխություններ կատարելու կարիք կա, և այդ ուղղությամբ աշխատանքներ են տարվում:
Անդրադառնալով Երկրապահ կամավորների միության շուրջ ստեղծված վիճակին՝ Բալասանյանն ասաց, որ ընդհանրապես, ցանկացած կազմակերպություն` լինի հասարակական թե քաղաքական, եթե նպատակ ունի երկրի անվտանգության ապահովմանը, սոցիալ-տնտեսական զարգացմանն օժանդակելու, ապա նրա գործունեության անհրաժեշտությունը կա։
«Ինչ վերաբերում է ԵԿՄ-ին, դա ՀՀ ներքին խնդիրն է, և նրանք պետք է որոշեն: Ես կարծում եմ, որ բոլոր նման կառույցների անհրաժեշտությունը կա, բայց դրանք պետք է գործեն օրենքի տառին համահունչ»,- ասաց նա:
Բալասանյանը խոսեց նաև Մարտի 1-ի գործով պարբերաբար շրջանառվող` Արցախից զինծառայողների ներգրավածության մասին խոսակցություններին: Նա նշեց, որ ընդհանրապես, ներքաղաքական նման վիճակներում իրականացվում են հրատապ որոշումներ զորանոցային վիճակի բերելու վերաբերյալ, որպեսզի անձնակազմը լինի հսկողության տակ:
«Այսօր ինձ համար դժվար է գնահատական տալ, սակայն ես համոզված եմ, որ Հայաստանի և Արցախի զինված ուժերի մասնակցությունը Մարտի 1-ի դեպքերին այն չէ, ինչի մասին բարձրաձայնվում է»,- նշեց Բալասանյանը:
Նա անդրադարձավ իրեն ուղղվող քննադատություններին՝ ասելով, որ շատ հանգիստ է վերաբերում դրանց:
«ժամանակ առ ժամանակ խոսում են Սասնա ծռերի դեպքերի մասին: Նրանք, ովքեր կողմնակից էին այդ գործողություններին, ինձ կապում են ՀՀ երկրորդ և երրորդ նախագահների հետ: Վերջին ժամանակահատվածում նաև տեսնում եմ, որ ոչ թե հասարակ քաղաքացիներ, այլև նախկին բարձրաստիճան անձինք շատ բացասական են խոսում իմ մասին և ինձ մեղադրում են Սասնա ծռերին մատնելու մեջ. դե, երևի նրանց պետք էր մի քանի հարյուր զոհ և վիրավոր ունենայինք այն ժամանակ: Ես իմ գնահատականը մեկ անգամ չէ, որ հնչեցրել եմ: ՀՀ իրավապահ կառույցները մեղմ գնահատական են տվել նրանց գործողություններին: Չի կարելի այսօր հերոսացնել նրանց. դա վտանգավոր երևույթ է, և այսօր էլ կհորդորեի, որ մարդիկ սթափվեն և լուրջ մտածեն»,- ասաց Բալասանյանը:
Նա նշեց, որ ցանկացած երկրում նման գործողություններն անհաջողության են մատնված, և երևի դա եզակի դեպք է եղել աշխարհում, որ բարեհաջող է ավարտվել։
Դավիթ Աբաղյան