ԵՐԵՎԱՆ, ՀՈԻՆԻՍԻ 16, 24News
Գլոբալացումը չի հանգեցրել ներդաշնակեցման, այլ ընդհակառակը, շատ առումներով մեծացրել է հասարակության բևեռացումը։ Համակարգային քաոսի նշաններ կան, որից պետք է ելք փնտրել։ Այս մասին RBC-ի սյունակում գրել է գործարար Ռուբեն Վարդանյանը։
Նրա կարծիքով՝ ներկայիս իրադարձությունները գլոբալ փոփոխությունների նոր ալիք են, որը կարող է տևել տասնամյակներ։ «Փոխակերպումները ցավալի կլինեն, և մեր կյանքի ոչ մի բնագավառ չի լինի, որի վրա դրանք չազդեն։ Իրավիճակը շատ ավելի վտանգավոր է, քան որեւէ համակարգի անկումը կամ ռազմական, տնտեսական, ֆինանսական հակամարտությունները»։
Վարդանյանի խոսքով՝ այնպիսի դրույթներ, ինչպիսիք են անմեղության կանխավարկածը, անհատի առավելությունը հասարակության նկատմամբ, մասնավոր սեփականության անձեռնմխելիությունը, տեղեկատվության ճշմարտացիությունն ու հավաստիությունը, միջին խավի կարևորությունը որպես ժամանակակից պետության հիմք, կարող են դեն նետվել։
Գործարարի կարծիքով՝ առկա ճգնաժամից դուրս գալու երեք սցենար կա. կարճաժամկետ հեռանկարում կարևոր է վերականգնել մատակարարման շղթաները և վերականգնել ֆինանսական համակարգերը, այլ կերպ ասած՝ արձագանքել մարդկանց և ձեռնարկությունների հրատապ կարիքներին: Միջնաժամկետ հորիզոնում որոշել մարտավարությունը և ռեսուրսների և գործընկերների մոբիլիզացումը, իսկ երկարաժամկետ հեռանկարում՝ զբաղվել տեխնոլոգիական զարգացմամբ:
Ապագայում կարելի է խոսել նոր համաշխարհային առևտրային կոալիցիաների և համաշխարհային վստահության նոր եզրագծի մասին։ «Քաղաքակրթական հակամարտություններում մեծանում է փոքր երկրների դերը քաղաքակրթությունների խաչմերուկում։ Իրենց չափերի և պատմական փորձի շնորհիվ նրանք կարող են լինել մեր ժամանակների մարտահրավերներին նորարարական պատասխաններ գտնելու առաջնագծում և օգնել նվազեցնելու բևեռացումը աշխարհում»,- կարծում է Վարդանյանը։
Բացի այդ, ըստ Վարդանյանի, մարդկությանը պետք են բարոյական առաջնորդներ, գործունեության տարբեր ոլորտների մարդիկ, ովքեր պատրաստ են միասին քննարկել առանցքային մարտահրավերները և փնտրել դրանց պատասխանները։ «Համակարգային քաոսը պահանջում է դուրս գալ յուրաքանչյուր առանձին շերտի մտածելակերպի սովորական «թունելից»՝ փորձելով տեսնել ամբողջական պատկերը: Հենց այս մարդիկ պետք է ձևավորեն վստահության նոր շրջանակ. մենք դրա ճգնաժամը տեսնում ենք ամբողջ աշխարհում, փոփոխության պահանջը գլոբալ է»,- նշում է նա։
--00—ՀԶ