ԵՐԵՎԱՆ, ՓԵՏՐՎԱՐԻ 22, 24News
Վրաստանի խորհրդարանը հինգշաբթի լիագումար նիստի ժամանակ կողմ չի քվեարկել ընդդիմադիրների կողմից նախկին նախագահ Միխեիլ Սաակաշվիլիի ռեժիմը հանցավոր հռչակելուն ուղղված նախագծին: Այդ մասին տեղեկացնում է օրենսդիր մարմինը:
Ընդդիմադիր «Հայրենասերների դաշինք» կուսակցության կողմից պատրաստված բանաձևի նախագիծը կոչվում է «Սաակաշվիլիի-Բոկերիա ռեժիմը հանցավոր անվանելու մասին»: Գիգա Բոկերիան Սաակաշվիլիի նախկին դաշնակիցն էր: Նրանք «Միասնական ազգային շարժում» կուսակցության առաջնորդներն էին, 2016-ին տարաձայնությունների պատճառով Բոկերիան իր համախոհների հետ առանձնացավ՝ ստեղծելով «Եվրոպական Վրաստան» կուսակցությունը:
Բանաձևի նպատակն է ճանաչել «քրեական և ավտորիտար» այն ռեժիմը, որ հաստատված է եղել Վրաստանում «Միասնական ազգային շարժում» կուսակցության ղեկավարման տարիներին, արդարադատության վերականգնումը, հանցագործությունների քննությունը և մեղավորներին պատժելը:
Նախագծի համաձայն` դատախազությանը հանձնարարվելու էր մինչև 6 ամսվա ընթացքում ավարտին հասցնել բոլոր քրեական գործերը՝ հարուցված նախկին կառավարության ղեկավարների դեմ:
Նախագծի օգտին քվեարկել է 45 պատգամավոր, 16-ը դեմ են եղել: Խորհրդարանում 150 պատգամավոր կա:
«Մենք ողջունում ենք բանաձևի բովանդակությունը, ինչպես նաև այն կարծիքը, որ 2004-2012 թթ. ռեժիմը հանցագործ է: Այնուամենայնիվ, բանաձևի իրավական մասի հետ կապված մենք ունենք նկատառումներ: Եթե այդ հատվածը վերանայվի, մենք կվերանայենք նման բանաձևն ընդունելու մեր որոշումը»,- հայտարարել է խորհրդարանի խոսնակ Իրակլի Կոբախիձեն:
Հիշեցնենք, որ Սաակաշվիլին Վրաստանը լքել է 2013-ին: Նրա նկատմամբ հայրենիքում մի շարք քրեական գործեր են հարուցվել, իսկ դրանցից մի քանիսով նրան ազատազրկում է սպառնում:
Սաակաշվիլիի նկատմամբ նաև ներքին հետախուզում է հայտարարվել:
Վրացական իշխանությունը բազմիցս հայտարարել է, որ Սաակաշվիլին սահմանը հատելու դեպքում կձերբակալվի: