ԵՐԵՎԱՆ, ՕԳՈՍՏՈՍԻ 30, 24News
«Հրապարակ» թերթը գրում է. «Ազգային ժողովից անհետացած առյուծի արձանիկի եւ հոբելյանական հուշամեդալների փաստով դեռեւս ամիսներ առաջ խորհրդարանում ծառայողական քննություն է իրականացվել։ Թե ում են նվիրված հուշամեդալները եւ արձանիկը, ԱԺ-ից ասացին միայն՝ քանի որ հուշամեդալները 2018-ից առաջ ստացածներն են, իսկ ԱԺ թանգարանը ստեղծվել է 2018-ին, մինչ այդ բոլոր հուշամեդալները տարբեր պահոցներում են եղել, եւ շատերի ծագումնաբանությունը՝ թե ում են հասցեագրված, հայտնի չէ։
Ծառայողական քննությունը հայտարարվել է ԱԺ աշխատակազմի ղեկավարի կողմից՝ թանգարանի տնօրինության եւ պատկան վարչության նկատմամբ, սակայն «գողոնն» այդպես էլ չի հայտնաբերվել, ու ստիպված դիմել են ոստիկանություն։ Շուրջ մեկ տարի առաջ թանգարանի ընդլայնման-վերանորոգման աշխատանքներ են սկսվել, պարբերաբար թանգարանային նմուշները տեղից տեղ են տեղափոխվել, հերթական տեղափոխության ժամանակ էլ հայտնաբերել են չորս նմուշի բացակայությունը։
Հիշեցնենք, որ «Հանրային ծառայությունների մասին» օրենքով պաշտոնատար անձը 60 հազար դրամը գերազանցող նվեր չի կարող ստանալ, ենթադրվում է, որ նմուշներն առավելագույնը կարող են այդ չափի լինել, ԱԺ-ից միայն ասացին, որ դրանք բրոնզե հուշանվերներ են եղել։
Թե ինչպես են անվտանգային խստացված ռեժիմի պայմաններում հուշանվերները խորհրդարանի շենքից դուրս հանվել, պարզ չէ։ Կարելի է միայն ենթադրել, որ ԱԺ անվտանգության մարմիններին, ըստ էության, հրահանգ է իջեցված՝ խստիվ զննել միայն լրագրողներին ու ընդդիմադիրներին»:
Առավել մանրամասն՝ թերթի այսօրվա համարում
--00--ԱՀ