ԵՐԵՎԱՆ, ԴԵԿՏԵՄԲԵՐԻ 9, 24News
2022 թվականին Հայաստանի տնտեսական աճը ռեկորդային է, որի մեջ ամենամեծ ներդրումն է ունեցել բարձր տեխնոլոգիական ոլորտը:
«Արմենպրես»-ի հաղորդմամբ՝ այս մասին տնտեսության տարբեր ճյուղերում խելացի լուծումների կիրառմանը նվիրված SILICON MOUNTAINS 2022 տարեվերջյան ամփոփիչ միջազգային տեխնոլոգիական գագաթնաժողովի ընթացքում ասաց ՀՀ էկոնոմիկայի նախարար Վահան Քերոբյանը:
«2022 թվականին Հայաստանի տնտեսական աճը ռեկորդային է: Տնտեսական բարձր աճն ապահովելու մեջ ամենամեծ ներդրումն ունեցել է բարձր տեխնոլոգիական ոլորտը՝ թե՛ ուղղակի, թե՛ անուղղակի կերպով: Այս տարի մոտ 50 տոկոս աճ է գրանցվել ՏՏ ոլորտում»,- նշեց Քերոբյանը։
Նախարարը նշեց, որ ոլորտն ունի խնդիրներ, դրանցից է դրամի կտրուկ արժևորումը, որի պատճառով ոլորտի շատ ընկերություններ հայտնվել էին օրհասական վիճակում։ Սակայն, նախարարի հավաստմամբ, կառավարությունն այդ ընկերություններին տրամադրեց անհրաժեշտ փրկօղակ։
«Մենք շարունակում ենք քննարկումները և ուզում ենք հասկանալ՝ ինչպիսի երկարաժամկետ լուծումներ կարող ենք առաջարկել, որպեսզի ավելի լայն հորիզոն տանք ընկերություններին իրենց աշխատանքի համար»,- նշեց նախարարը:
Նա նաև վստահեցրեց, որ կառավարությունը մեկնարկել և իրականացնում է տնտեսության արդիականացման ծրագրեր։
Silicon Mountains առաջին համաժողովն անցկացվել էր 2019թ. նվիրված էր ՏՀՏ ոլորտում «խելացի լուծումներին» և համաշխարհային շուկայում առաջիկա տարիներին սպասվող զարգացումներին: Համաժողովի պատվավոր հյուրն էր ՏՏ ոլորտում համաշխարհային ներդրման համար ՀՀ պետական մրցանակի 2019թ. դափնեկիր, ճապոնացի գիտնական դոկտոր Տակեո Կանադեն: Միջոցառմանը մասնակցում էին բանախոսներ համաշխարհային առաջատար կազմակերպություններից՝ Microsoft, Cisco, nCipher Security եւ NXP Semiconductors:
2021թ. կայացավ Silicon Mountains երկրորդ համաժողովը՝ նվիրված տնտեսության մեջ խելացի լուծումների կիրառությանը (Digital Smart Economy)։ Համաժողովի հատուկ հյուրն էր Սինոփսիս վերազգային ընկերության նախագահ Դր. Չի-Ֆուն Չանը, ով ՏՏ ոլորտում համաշխարհային ներդրման համար ՀՀ պետական մրցանակի 2020 թվականի (GIT Award 2020) մրցանակակիրն է։
2022 թվականին կայացավ թվով երրորդ Silicon Mountains համաժողովը, որը նվիրված էր թվային փոխակերպմանը։ Միջոցառմանն աջակցում էր ՀՀ Կենտրոնական բանկը։ Գագաթնաժողովի շրջանակում ՀՀ Կենտրոնական բանկի փոխնախագահ Ներսես Երիցյանը ներկայացրեց «Կառավարության և ԿԲ համատեղ թվայնացման օրակարգը» թեման: Միջոցառման ընթացքում կայացավ երկու պանելային քննարկում՝ Թվային փոխակերպում և Ֆինտեք։
--00—ՅՄ