ԵՐԵՎԱՆ, ՄԱՐՏԻ 12, 24News
ԱՄՆ կոնգրեսական Ադամ Շիֆը և Հանրապետական կուսակցության անդամ Գուս Բիլիրակիսը դիմել են Ներկայացուցիչների պալատին՝ Հայոց ցեղասպանության ճանաչման վերաբերյալ բանաձևի ներկայացնելու հարցում միանալու խնդրանքով: Այդ մասին հայտնում է Asbarez-ը։
Երկկուսակցական փաստաթղթի նպատակն է այնպես անել, որ ԱՄՆ իշխանության քաղաքականությունը հետևի ստորև ներկայացված կետերին.
1. Հայոց ցեղասպանության հերքման մերժում,
2. ԱՄՆ կառավարության կողմից հանցանքի պաշտոնական ճանաչում և ոգեկոչում,
3. Ժամանակակից աշխարհում այդպիսի դաժանությունները կանխելու նպատակով Հայոց ցեղասպանության թեմայով ուսուցում կազմակերպելու, հարցի շուրջ հանրային իրազեկման կարևորության գիտակցում:
Բիլիրակիսը և Շիֆը կարծիք են հայտնել, որ Հայոց ցեղասպանության պաշտոնական ճանաչումը բխում է ԱՄՆ-ի և երկրի ազգային անվտանգության շահերից:
«Ցեղասպանության պաշտոնական ճանաչումը կօգնի նոր էջ բացել ԱՄՆ-ի արտաքին քաղաքականությունում: Ժամանակն է, որ Միացյալ Նահանգները ոտքի ելնի հանուն ճշմարտության և ընդդեմ Ցեղասպանության հերքման»,-նշել են կոնգրեսականները:
Նրանց նախաձեռնությանն արձագանքել է ԱՄՆ Հայ դատի հանձնախմբի գրասենյակը, որի նախագահ Րաֆֆի Համբարյանը գործադրած ջանքերի համար իր երախտագիտությունն է հայտնել Շիֆին և Բիլիրակիսին: