ԵՐԵՎԱՆ, ՄԱՐՏԻ 21, 24News
ԱՄՆ Հայ դատի հանձնախմբի գրասենյակին (ANCA) ուղղված տեսաուղերձում 2020 թ. կայանալիք ընտրություններում նախագահի դեմոկրատ թեկնածու, ԱՄՆ Կոնգրեսում Հավայիներից ընտրված օրենսդիր Թուլսի Գաբարդը կոչ է արել փոփոխություններ անել երկրի վարած արտաքին քաղաքականությունում, Հայոց ցեղասպանության ճանաչման հարցով արդար բանաձև ներկայացնել և նպաստել Հայաստանի ու Արցախի անվտանգությանը, բարգավաճելուն:
Տեսաուղերձում Թուլսի Գաբարդը պատմել է նաև 2017 թ. Հայաստան և Արցախ կատարած այցի մասին:
«Հայոց ցեղասպանությունը պետք է ճանաչվի, որպեսզի մարդկության պատմության ամենասոսկալի հանցագործություններից մեկի վերաբերյալ արդար վճիռ կայացվի»,-ասել է Գաբարդը, ապա նաև անդրադարձել է ԼՂ հակամարտության կարգավորմանը՝ ընդգծելով, որ Միացյալ Նահանգները պետք է պահպանի ԵԱՀԿ Մինսկի խմբի ձևաչափում իր միջնորդական դերը, սակայն միևնույն ժամանակ այն չպետք է շարունակի կեղծ հավասարության քաղաքականությունը և ազնվորեն չխոսի այն ժամանակ, երբ կողմերից որևէ մեկը խախտում է հրադադարի ռեժիմը:
«Միացյալ Նահանգներն անկողմնակալ միջնորդի դերը պահպանելու համար չպետք է առաջ տանի այնպիսի բանաձև, որը հիմնված կլինի միայն Արցախի ու Հայաստանի կողմից անհապաղ ու մշտական զիջումների վրա և միևնույն ժամանակ կենթադրի Ադրբեջանի կողմից համարժեք զիջումների բացակայություն»,- ասել է Գաբարդը:
Ըստ Թուլսի Գաբարդի՝ թեև հիմնախնդրի կարգավորման հարցում տարածքային ամբողջականության սկզբունքին հավատարիմ մնալը կարևոր է, այնուհանդերձ, կարևոր է նաև բոլոր ժողովուրդների ինքնորոշման իրավունքի հարգումը:
Մանրամասները՝ ստորև ներկայացված տեսանյութում։