ԵՐԵՎԱՆ, ՄԱՐՏԻ 21, 24News
Վարչապետ Նիկոլ Փաշինյանը Կենտրոնական բանկի նախագահ Արթուր Ջավադյանի հետ քննարկման ժամանակ հարց բարձրացրեց, որ քաղաքացիների կողմից բողոքները կրկնվում են, երբ առաջարկվում է վարկ, օրինակ՝ 15 տոկոսով, տեղում պահանջում են որոշակի ծառայությունների վճարներ և իրականում ստացվում է 24 տոկոս:
«Ասում ենք, որ վարկի տոկոսն իջել է, սակայն քաղաքացիների հետ շփումից ստացվում է, որ ծառայությունների վճարների միջոցով իրական տոկոսները չենք կարողանում արձանագրել: Վարկը ստանալու պահին քաղաքացին ի՞նչ ծախսեր պետք է անի, և այս գործընթացը որքանո՞վ է օրինական և տրամաբանական»,-ասաց վարչապետը:
Կենտրոնական բանկի նախագահ Արթուր Ջավադյանը նշեց, որ խոսքն էֆեկտիվ տոկոսադրույքի մասին է, և ընդունված սպառողական կրեդիտավորման մասին օրենքով քաղաքացիների շահերը պաշտպանված են:
«Մինչև տասը միլիոնանոց սպառողական վարկերի դեպքում ֆինանսական կառույցը պարտավոր է բոլոր տիպի վճարները ներառել տոկոսի մեջ և ընդգծված ձևով ներկայացնել, թե որքան է տոկոսը, կառավարման վճարը, գնահատման վճարը մտցնել տոկոսի մեջ, գումարը ֆիքսել, թե որքան է քաղաքացին մարելու, որից հետո միայն քաղաքացին վարկի պայմանագիրը ստորագրում է»,-ասաց նա և նշեց, որ այդ պրակտիկան տարիներ շարունակ իրականացնում են և հիփոթեկային օրենսդրության մեջ ևս նույնը ներառել են:
Վարչապետը հարցրեց, թե հնարավոր չէ՞ տոկոսի մասին հայտարարություններն այդ հաշվառումով անել, որպեսզի իմանան շուկայում ինչ է կատարվում:
«Մտավախությունն այն է, որ թվերն իրականությունը չեն արտացոլում, և կարող ենք սխալ եզրակացությունների գալ»,-արտահայտվեց վարչապետը:
Փոխվարչապետ Մհեր Գրիգորյանը վստահեցրեց, որ հայտարարված տոկոսադրույքները բացարձակապես համապատասխանում են իրականությանը:
«Ձեր ասած խնդիրը գուցե մանր սպառողական վարկերին է վերաբերում, բայց, կարծում եմ, որ շուկան կկարգավորի, բայց ԿԲ-ն էլ բավարար գործիքակազմ ունի, որ զսպի», -ասաց Գրիգորյանը։
Բնապահպանության նախարար Էրիկ Գրիգորյանն օրինակ բերեց 2,5 միլիոն դրամ վարկ վերցնելու և պահանջվող վճարների մասին:
«Հո Ձեզ հետ դա չի պատահել»,-կատակեց վարչապետը, և Էրիկ Գրիգորյանը նշեց, որ ինքն աշխատում է վարկ չվերցնել: Այսպիսով` նախարարը նշեց, որ խնդիրը փոքր վարկերի հետ է կապված:
Կենտրոնական բանկի նախագահն էլ նշեց, որ իրենց վերցրած վարկերն էլ են այդպիսին, դրանց համար էլ վճարներ կան: Արթուր Ջավադյանը բարձրացրեց գրավատների հարցը և նշեց, որ այստեղ խնդիր կա նրանց կողմից ներկայացված տոկոսադրույքների առումով, քանի որ դա երբեմն գերազանցում է հարյուր տոկոսը:
«Հայաստանում հարյուր տոկոսով վարկ կա՞»,- հարցրեց վարչապետը, և Արթուր Ջավադյանը նշեց, որ կարծում է՝ դրանից ավել էլ կա: ԿԲ նախագահը չհամաձայնեց, որ գրավատները փոքր և միջին բիզնես են և օրինակ բերեց, թե որքան հարկ են տալիս գրավատները:
Մհեր Գրիգորյանն իր անհամաձայնությունը հայտնեց. «Դա վաշխառություն չէ, սա շուկա է, եթե մարդը վարկ է վերցրել և ժամանակին չի մարել, թող նրա վարկը 50 տոկոսով լինի»:
«Ֆինանսական հարաբերություներում և ընդհանրապես բոլոր հարաբերություններում ամենակարևոր արձանագրումը հետևյալն է, որ ամեն մարդ ի վերջո ինքն է պատասխանատու իր գործունեության հետևանքների համար: Սա ՀՀ-ում շատ դեպերում արձանագրված չէ»,-ասաց Նիկոլ Փաշինյանը՝ անդրադառնալով ֆինանսական գրագիտությանը: