ԵՐԵՎԱՆ, ԱՊՐԻԼԻ 25, 24News
«Fresno Bee» պարբերականն անդրադարձել է ԱՄՆ նախագահ Դոնալդ Թրամփի ապրիլքսանչորսյան ուղերձին՝ նշելով, որ Սպիտակ տան հայտարարության մեջ այս տարի ևս չխոսվեց ցեղասպանության ճանաչման մասին:
«Ռոնալդ Ռեյգանից հետո ԱՄՆ որևէ նախագահ պաշտոնական կարգավիճակ չի տվել թուրքական իշխանության օրոք քրիստոնյա հայերի հետ պատահածին: Թրամփն օգտագործեց «20-րդ դարի վատագույն զանգվածային դաժանություններից մեկը» արտահայտությունը՝ կրկնելով Սպիտակ տանն իրեն նախորդածների ձևակերպումները: Օրինակ, Բարաք Օբաման 2015 թվականանի ուղերձում կատարվածն անվանել էր «20-րդ դարի առաջին զանգվածային վայրագություն»»,-գրում է պարբերականը:
«Fresno Bee»-ն նաև հիշեցնում է, որ ԱՄՆ-ի 40-րդ նախագահ Ռոնալդ Ռեյգանը 1981 թվականի հրեաների Հոլոքոստի մասին խոսելիս անդրադարձել էր նաև հայերի ցեղասպանությանը:
«Ինչպես նախքան այդ տեղի ունեցած հայերի ցեղասպանությունը, դրան հաջորդած կամբոջացիների ցեղասպանությունն ու շատ այլ ազգերի նմանատիպ բռնաճնշումները, այնպես էլ Հոլոքոստի դասերը երբեք չպետք է մոռացվեն»,-ասել էր Ռեյգանը:
Պարբերականի հոդվածում հեղինակը ներկայացրել է նաև նախագահ Թրամփի ուղերձը հայերին։