Կիպրոսը հայոց ցեղասպանությունն ընդունած՝ Եվրոպայում՝ 1-ին, աշխարհում 2-րդ երկիրն է

ԵՐԵՎԱՆ, ԱՊՐԻԼԻ 25, 24News

1

Կիպրոսը աջակցում է Հայոց ցեղասպանության միջազգային ճանաչմանը հասնելու Հայաստանի ջանքերին: Այս մասին ասված է Հայոց ցեղասպանության 104-րդ տարելիցի կապակցությամբ Կիպրոսի նախագահ Նիկոս Անաստասիադեսի հայտարարության մեջ:

Հայտարարության մեջ նշված է, որ Կիպրոսի նախագահն ու կառավարությունը դատապարտում են հայ ժողովրդի դեմ այդ սարսափելի հանցագործությունը՝ այն համարելով որպես բիծ մարդկության պատմության մեջ:

Կիպրոսի նախագահն ընդգծել է, որ Կիպրոսն աջակցում է Հայաստանի ջանքերին՝ Հայոց ցեղասպանության միջազգային ճանաչմանը հասնելու հարցում՝ հավելելով, որ Կիպրոսը Եվրոպայում առաջին, իսկ աշխարհում երկրորդ երկիրն է, որը ճանաչել է այդ սարսափելի հանցագործությունը և պահանջում է պատմական արդարության հաստատում:

Դիմելով Կիպրոսի հայկական համայնքին՝ Նիկոս Անաստասիադեսն ընդգծել է, որ նրանք էական ներդրում են ունեցել այն առաջընթացի մեջ, որին հասել են ընդհանուր հայրենիքում: «Մեր համակեցությունն օրինակ է ամբողջ աշխարհի համար»,- ասված է Կիպրոսի նախագահի հայտարարության մեջ: