ԵՐԵՎԱՆ, ՄԱՅԻՍԻ 15, 24News
Ոստիկանության Արաբկիրի բաժնի ծառայողները մայիսի 13-ին ապօրինի պահվող զենք-զինամթերքի վերաբերյալ հերթական օպերատիվ տեղեկություններն են ստացել, որոնց հիման վրա բաժնի հետաքննության բաժանմունքում քրեական գործ է հարուցվել։ Այդ մասին տեղեկանում ենք ոստիկանության կայքէջից։
Մայիսի 14-ին հարուցված քրեական գործի շրջանակում դատարանի որոշմամբ Արաբկիրի ոստիկանները խուզարկել են Արարատի մարզի Գեղանիստ գյուղի տներից մեկը՝ հայտնաբերելով մեծ քանակությամբ ապօրինի պահվող զենք-զինամթերք։
Գործարանային համարը ներկանյութով ծածկված «Կալաշնիկովի» ինքնաձիգը՝ տարբեր տեսակի մեկփողանի հրացանները, 3 նռնակը, ընդհանուր 800 գրամ քաշով պայթուցիկ նյութերը, տարբեր տրամաչափի 90-ից ավելի փամփուշտները, փամփուշտներով լիցքավորված պահունակները և այլ ռազմամթերքն առգրավվել ու փաթեթավորվել է դատաձգաբանական փորձաքննության ուղարկելու նպատակով։
Տանտերը՝ 55-ամյա Գ. Բ.-ն, բերման է ենթարկվել ոստիկանության Արաբկիրի բաժին ու ձերբակալվել։
Արաբկիրի ոստիկանները, համագործակցելով տարածքային այլ ստորաբաժանումների գործընկերների հետ, հետախուզական միջոցառումներ են ձեռնարկում հայտնաբերված զենք-զինամթերքի ձեռքբերման աղբյուրը պարզելու ուղղությամբ։
Քննությունը շարունակվում է։