ԵՐԵՎԱՆ, ՄԱՅԻՍԻ 15, 24News
ԱՄՆ-Իրան պատերազմն ավելի ծանր կլինի, քան Իրաքի պատերազմը: Այս մասին հայտարարել է ամերիկացի սենատոր Բեռնի Սանդերսը՝ ի պատասխան The New York Times-ի հարցմանը՝ արդյոք ԱՄՆ նախագահ Դոնալդ Թրամփի վարչակազմը դիտարկում է Մերձավոր Արեւելք 120000 զինծառայող ուղարկելու ծրագիրը:
Այդ գաղափարը, հաղորդագրությունների համաձայն, առաջարկել է նախագահի ազգային անվտանգության հարցերով խորհրդական Ջոն Բոլթոնը, որն Իրաքի թեժ հակամարտության ժամանակ աշխատում էր Ջորջ Բուշի վարչակազմում:
«16 տարի առաջ ԱՄՆ-ն իր պատմության ամենակոպիտ սխալը թույլ տվեց՝ հարձակվելով Իրաքի վրա»,- հայտարարել է Սանդերսը՝ Periscope-ի ուղիղ եթերում: Բացի այդ, նա Բոլթոնին պատերազմի աջակից է անվանել:
«Կարծես թե Ջոն Բոլթոնը ցանկանում է պատերազմել Իրանում, որն, իմ կարծիքով, ավելի ծանր կլինի, քան Իրաքում»,- ասել է Սանդերսը:
Նա նաեւ հայտնել է, որ աշխատում է Կոնգրեսում կոալիցիա ստեղծելու ուղղությամբ, որը նախագահ Թրամփին կստիպի Կոնգրեսից թույլտվություն խնդրել՝ Իրանում ռազմական գործողություններին մասնակցելու համար:
Նշենք, որ նախօրեին Թրամփը հերքել էր Times-ի տեղեկությունները՝ դրանք «ֆեյք նորություններ» անվանելով: