Վերջին իրադարձությունների ֆոնին 24News-ը ներկայացնում է նախկին բարձրաստիճան պաշտոնյաների հետ ազգակցական կապ ունեցող դատավորներին, նրանց ունեցվածքն ու եկամուտը։
1․ Կրակեմ Հրաչի որդին՝ Երևանի ընդհանուր իրավասության դատարանի դատավոր
ԱԱԾ պետական պահպանության ծառայության նախկին պետ Հրաչյա Հարությունյանի (հայտնի է Կրակեմ Հրաչ անունով) որդին՝ 37-ամյա Դավիթ Հարությունյանը, չնայած իր երիտասարդ տարիքին, մեծ ունեցվածք է կուտակել: Նա 2016-ի փետրվարի 19-ին նշանակվել է Երևանի ընդհանուր իրավասության դատարանի Ավան և Նոր-Նորք նստավայրի նախագահի պաշտոնը։ 2016-ին՝ պաշտոնը ստանձնելիս, հայտարարագրել է երկու բնակարան, անհատական բնակելի երկու տուն, երկու ավտոտնակ և բազմաբնակարան շենքի ոչ բնակելի տարածք, MITSUBISHI PAJERO 3.8 մակնիշի ավտոմեքենա, 12 մլն դրամ, 190 հազար ԱՄՆ դոլար։ 2017-ին Դավիթ Հարությունյանը շարունակել է պաշտոնավարել Երևան քաղաքի ընդհանուր իրավասության դատարանի դատավորի պաշտոնում:
Բարձրաստիճան պաշտոնատար անձանց էթիկայի հանձնաժողովի համաձայն՝
2017-ին տարեսկզբին նա հայտարարագրել է 12 մլն դրամ և 190 հազար դոլար, իսկ տարեվերջին նրա դրամական միջոցները նվազել են 7 հազար դոլարով։ Որպես եկամուտ՝ նա հայտարարագրել է իր աշխատավարձը, որը 2017-ին ամսական կազմել է 908 հազար դրամ։
Դատավորի տիկնոջ՝ Ռուզաննա Մանթաշյանի հայտարարագրի համաձայն՝ նա ամուսնուց ավելի հարուստ է։ 2016-ին Ռուզաննա Մանթաշյանի դրամական միջոցները կազմել են 410 հազար դոլար եւ 15 մլն դրամ:
2․ Սերգո Երիցյանի որդին՝ Աջափնյակ և Դավթաշեն վարչական շրջանների ընդհանուր իրավասության դատարանի դատավոր
Լեզվի պետական կոմիտեի նախկին նախագահ Սերգո Երիցյանի որդին` Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի դատավոր Սարգիս Երիցյանն է։ 2017-ի տարեսկզբին դատավորը հայտարարագրել է 53,121,415.00 դրամ, 147 հազար ԱՄՆ դոլար և 8 000 եվրո։ Տարեվերջին Սարգիս Երիցյանը հայտարարագրել է 91,471,368.00 դրամ, 38,800 ԱՄՆ դոլար, 1,300 եվրո։ Որպես եկամուտ՝ նա հայտարարագրել է իր աշխատավարձը, որը 2017-ին ամսական կազմել է 988 հազար դրամ։
3․ ԱԱԾ պետի նախկին տեղակալի դուստրը կրկին դատավորների շարքում է
2013-ից ՀՀ վարչական դատարանի դատավոր Անի Հարությունյանի հայրը ՀՀ Ազգային անվտանգության ծառայության նախկին պետի տեղակալ Գրիշա Հարությունյանն է: Դատավորը 2017-ին հայտարարագրել է երկու ավտոմեքենա՝ BMW X4 մակնիշի ավտոմեքենա, որը ձեռք է բերել 31,941,660.00 դրամով և VOLKSWAGEN TOUAREG 4.2 մակնիշի ավտոմեքենա։ Դատավոր Անի Գրիգորյանը 2017-ին հայտարարագրել է նաև 60 մլն դրամ, 200,000 եվրո, 350,000 ԱՄՆ դոլար։ 2017-ին նա ստացել է 61,766,768 դրամ եկամուտ։
2013-ից ՀՀ վարչական դատարանի դատավոր Ռաֆիկ Խանդանյանը ՀՀ վերաքննիչ քաղաքացիական դատարանի դատավոր՝ Գագիկ Խանդանյանի որդին է։ դատավորը 2017-ին հայտարարագրել է 47,000,000 դրամ, 70,000 ԱՄՆ դոլար, 22,000 եվրո։ 2017-ին նրա եկամտի չափը կազմել է 6,929,120 դրամ։
4․ԱԺ նախկին նախագահի փեսան
Կոտայքի մարզի առաջին ատյանի ընդհանուր իրավասության դատարանի դատավոր Արման Օհանյանը Աժ նախկին խոսնակ Արմեն Խաչատրյանի փեսան է․որը նույնպես աչքի է ընկել բավական բարձր եկամուտներով։ 2018-ին նա հայտարարագրել է 110,000 ԱՄն դոլար, 75,000,000 դրամ, 85,000 եվրո։ 2018-ին նրա եկամուտը կազմել է 10,527,794 դրամ։
5․ Գեներալ Մանվելի դուստրը դատավորների շարքում է
2005 թ-ից Արմավիրի մարզի ընդհանուր իրավասության դատարանի դատավոր Նաիրա Գրիգորյանը ԵԿՄ նախկին նախագահ, ԱԺ նախկին պատգամավոր գեներալ Մանվել Գրիգորյանի դուստրն է։ Վերջինիս եկամուտները, սակայն, բավկան համեստ են։ 2018-ին դատավորը հայտարարագրել է 1,950,000 դրամ։ Նույն տարվա ընթացքում նրա եկամուտը կազմել է 7,298,523 դրամ։