ԵՐԵՎԱՆ, ՀՈՒLԻՍԻ 5, 24News
«Սահմանադրություն՝ հանուն արարող Հայաստանի» խորագրով խորհրդաժողովի ժամանակ իր ելույթում նշեց ՀՅԴ ԳՄ անդամ Արծվիկ Մինասյանը՝ անդրադառնալով ՀԱԿ փոխնախագահ Լևոն Զուրաբյանի ելույթի ժամանակ հնչեցրած տեսակետին, թե պետք է վերադառնալ 1995 թ.-ի Սահմանադրության մեջ ամրագրված կառավարական մոդելին, ասել է, որ 1995 թ․-ի Սահմանադրությանը վերադառնալը մեծ հաշվով ներկայիս իշխանության ծրագիրն է, ինչը նշանակում է, որ մենք հետ ենք գնում:
«Պետք է գիտակցենք, որ ամեն հաջորդ սերնդին պետք է թողնենք ավելի զարգացած Հայաստան, քան մենք ստացել ենք: Սա է զարգացման բանաձևը, այլ տարբերակ չկա: Խոսվեց այն մասին, որ կարող ենք վերադառնալ 95 թվական: Բանախոսներից մեկը, որ խոսեց 95-ի Սահմանադրության վերադարձի մասին... սա, մեծ հաշվով, ներկայիս իշխանության ապագա ծրագիրն է, ինչը նշանակում է, որ մենք հետ ենք գնում: Մենք չպետք է թողնենք, որ մեզ նորից վերադարձնեն այն ժամանակները, երբ սուլթանիզմի տարրեր կային»,-ասել է Արծվիկ Մինասյանը, ապա նկատել, որ քաղաքական համակարգն օգտագործվում է տարբեր խմբերի կողմից սեփական ներխմբային քաղաքական կամ մանկության երազանքն իրականացնելու ձգտումով՝ առանց պատասխանատվություն զգալու ապագայի նկատմամբ:
Արծվիկ Մինասյանի արտահայտած կարծիքին արձագանքել է Լևոն Զուրաբյան՝ նշելով, որ զավեշտալի է, երբ ահաբեկչությունը իր ներքին քաղաքական հարցերում մեթոդոլոգիա որդեգրած կուսակցությունը խոսում է ժողովրդավարությունից և սահմանադրականությունից:
ՀՅԴ-ական Բագրատ Եսայանը ևս արձագանքել է. «Ահաբեկչություն եք արել նախարարների մակարդակով. ներքին գործերի նախարարությունը ահաբեկչական կառույց էիք դարձրել: Հիշե՛ք՝ ում եք գնդակահարել դուք և ասեք, թե ում ենք գնդակահարել մենք: Դուք ուժի մեջ մտած դատավճիռներ ունեք: Մեր հանցագործությունները եղել են թուրքի դեմ, իսկ ձերը հայերի դեմ»:
ՀՅԴ-ական Արծվիկ Մինասյանը հավելել է, որ երբ քաղաքական աղբանոց նետված ուժը նորից սկսում է իրեն արժևորել, բնականաբար, պետք է թիրախ գտնի:
Լևոն Զուրաբյանը հարցրել է՝ իր ասածի մեջ ՀՅԴ-ականներն իրե՞նց տեսան. «Ձե՞զ էի ասում»։