ԵՐԵՎԱՆ, ՀՈՒԼԻՍԻ 06, 24News
Ամերիկյան Amazon ընկերության ղեկավար Ջեֆ Բեզոսը պաշտոնապես ամուսնալուծվել է կնոջից՝ ՄքՔենզիից, հայտնում է bloomberg.com-ը:
Ամուսնալուծության գործընթացի ավարտը կդառնա Բեզոսի կողմից նախկին կնոջը Amazon ընկերության 19,7 մլն բաժնետոմսերի փոխանցման սկիզբը: Փաթեթի արժեքը գնահատվում է 38,3 մլրդ դոլար, ինչը թույլ կտա նրան դառնալ մոլորակի ամենահարուստ կինը:
Միևնույն ժամանակ, ՄքՔենզին մտադրություն ունի իր կարողության կեսը բարեգործությանը հատկացնել:
Ավելի վաղ Բեզոսը շնորհակալություն էր հայտնել նախկին կնոջը «ցուցաբերած աջակցության և բարության համար»:
Բեզոսներն ամուսնացած են եղել 25 տարի: Անցյալ տարվա վերջին Ջեֆ Բեզոսի կարողությունը գնահատվել է 131 միլիարդ դոլար, և այդ ցուցանիշով նա երկրորդ տարին անընդմեջ գլխավորում է Forbes-ի ցուցակը՝ առաջ անցնելով Microsoft ընկերության հիմնադիր Բիլ Գեյթսից:
Ավելի վաղ համացանցում հրապարակվել էին լուսանկարներ, որոնք ապացուցում են, որ աշխարհի ամենահարուստ մարդը՝ Amazon ընկերության ղեկավար Ջեֆ Բեզոսը, նախքան ամուսնալուծության մասին պաշտոնապես հայտնելը կապված է եղել հաղորդավարուհի Լորեն Սանչեսի հետ:
Ինչպես հայտնել էր Daily Mail-ը, լուսանկարներն արվել են հոկտեմբերի 30-ին՝ Լոս Անջելեսի ռեստորաններից մեկում: Դրանցում երևում է՝ ինչպես է զույգն անկաշկանդ զրուցում ու ծիծաղում:
Սակայն քաջատեղյակ աղբյուրն այլ տեղեկություն է ներկայացրել՝ նշելով, որ Ջեֆն ու ՄքՔենզին ջանք չեն խնայել ամուսնությունը պահպանելու համար, սակայն դա հնարավոր չի եղել և որ միլիարդատերը սկսել է Սանչեսի հետ հանդիպել միայն կնոջից հեռանալուց հետո: