ԵՐԵՎԱՆ, ՍԵՊՏԵՄԲԵՐ 29, 24News
«Հայաստանի փոքրիկ երգիչներ» երգչախումբն ու գեղարվեստական ղեկավար Տիգրան Հեքեքյանը շարունակում են ահազանգել Արամի 23 հուշարձան–շենքի փլուզման մասին։ Այսօր՝ սեպտեմբերի 29-ին, երգչախմբի սաները կրկին բողոքի ակցիա անցկացրեցին շենքի վերակառուցման պահանջով։
Արամի 23-ի հարևանությամբ տեղի ունեցող էլիտար շինարարությունն օրեցօր ավելի է խարխլում պատմական շինության հիմքերը։ Տիգրան Հեքեյանի խոսքով՝ իրենց առաջին ահազանգի օրվանից՝ օգոստոսի 13-ից, անցել է մեկուկես ամիս։ Հեքեքյանը դիմել է բոլոր պատկան կառույցներին։
«Գալիս-գնում են, բայց գործընթացը շատ դանդաղ է տեղի ունենում, մեկ-մեկ թվում է, թե ձև են տալիս, իբր, զբաղվում են հարցով»,- 24News-ի հետ զրույցում նշեց «Հայաստանի փոքրիկ երգիչների» գեղարվեստական ղեկավարը։
Հեքեքյանը նշեց, որ երգչախմբի փորձերն անցկացնում են՝ որտեղ պատահի։
«Մենք այս վիճակում հայտնվել ենք 2007-ին, հիշում եմ՝ ԱԺ նախագահը թույլ տվեց, որ փորձերն անցկացնենք ոսկեզօծ դահլիճում, գիշերը՝ ավտոմատներով, մեզ ուղեկցում էին․․․ Երգում էինք։ Երևի այդպես պետք է անել՝ Բաղրամյան 26-ում տեղ հատկացնեն, գնանք փորձենք, մինչև դանդաղ փրկեն այս շենքի ճակատագիրը»,- ասաց նա։
Հեքեյանի կարծիքով՝ պատմամշակութային հուշարձանների պահպանման մասին համապատասխան օրենքը պետք է խստացնել, քրեական գործ հարուցել ու բոլորին «նստեցնել»։
Նա վստահեցնում է, որ ներկա իշխանությունները չեն կարողանում նախորդի մնացուկների դեմ պայքարել։