Բերման ենթարկվածներն անվճար իրավաբանական օգնություն կստանան․ փաստաբանների պալատ

ԵՐԵՎԱՆՕԳՈՍՏՈՍԻ 19, 24News

Ամուլսար

ՀՀ փաստաբանների պալատը ձևավորել է փաստաբանների խումբ, որոնք Ամուլսարի հանքի շահագործման դեմ բողոքող բերման ենթարկվածներին անվճար առաջին իրավաբանական օգնություն կցուցաբերեն։ Այդ մասին տեղեկանում ենք փաստաբանների պալատի տարածած հայտարարությունից։

«Նկատի ունենալով Ամուլսարի հանքի շահագործման դեմ հանրային միջոցառումների ժամանակ ոստիկանության կողմից քաղաքացիներին բերման ենթարկելու դեպքերը և քաղաքացիներին առաջին իրավաբանական օգնություն տրամադրելու անհրաժեշտությունը, ՀՀ փաստաբանների պալատը ձևավորել է փաստաբանների խումբ՝ բերման ենթարկված քաղաքացիներին անվճար առաջին իրավաբանական օգնություն տրամադրելու համար:

Միաժամանակ հայտնում ենք, որ խմբին միանալու ցանկություն ունեցող փաստաբանները կարող են իրենց տվյալներն ուղարկել ՀՀ փաստաբանների պալատի [email protected] էլեկտրոնային հասցեին՝ նշելով անուն, ազգանուն, արտոնագրի համար, հեռախոսահամար: 

Փաստաբաններ-բերման ենթարկվածներ կապը կապահովի ՀՀ փաստաբանների պալատի արագ արձագանքման հանձնախմբի համակարգող, փաստաբան Գևորգ Մկրտչյանը (հեռախոսահամարներ՝ (010) 600701, (077) 007792)»,- նշված է հայտարարության մեջ։