ԵՐԵՎԱՆ, ՕԳՈՍՏՈՍԻ 22, 24News
ՀՀ վարչապետ Նիկոլ Փաշինյանը Ջերմուկի բազմաբնակարան շենքերում շրջում է տուն առ տուն՝ փորձելով բնակիչներից ճշտել՝ կո՞ղմ են Ամուլսարի հանքի շահագործմանը։
Բնակիչներից մեկը, պատասխանելով վարչապետի այն հարցին, թե ի՞նչ է կարծում հանքի շահագործման մասին, ասել է, որ հարցին խիստ բացասաբար է վերաբերում։
«Ջերմուկը պետք է մնա Ջերմուկ, մնա որպես հանգստարան։ Չեմ կարծում, որ առողջարանային քաղաքի կողքին պետք է հանք շահագործվի», - ասել է Ջերմուկի բնակչուհին։
Վարչապետին իր բնակարան է հրավիրել ԱՄՆ-ից Հայաստան վերադարձած և Ջերմուկում հաստատված Գոհար Հունանյանը։ Զրույցի ընթացքում նա վարչապետ Փաշինյանին ասել է, որ չէր ցանկանա բնակվել ապականված բնությամբ քաղաքում։
«Շատ ընկերներ ունեմ, որոնք ուզում են իմ օրինակին հետևել, հույս ունենք, որ Հայաստանը կմնա էկոլոգիապես մաքուր երկիր», - ասել է Գոհար Հունանյանը։ Նիկոլ Փաշինյանն իր հերթին նկատել է, որ հանքի աշխատանքը չպետք է որևէ ազդեցություն ունենա հողի, ջրի և օդի մաքրության վրա։
«Ուրիշ տարբերակ չունենք։ Մենք խնդիր ենք դնում, որ վտանգը պետք է լինի զրո։ Ըստ պլանի՝ կան ամենշաբաթյա, ամենամսյա մոնիտորինգներ, սարի խոտը պետք է լաբորատոր հետազոտություն անցնի։ Փոշու աղբյուրը պետք է գտնել, և եթե խնդիրը չի վերացվում, հանքը լրիվ օրինական կերպով փակվում է», - ասել է վարչապետը։
ՀՀ վարչապետ Նիկոլ Փաշինյանի շրջայցը Ջերմուկ քաղաքի բնակիչների տներով շարունակվում է։ Ուղիղ եթերին կարող եք հետևել այստեղ։