ԵՐԵՎԱՆ, ՍԵՊՏԵՄԲԵՐԻ 3, 24News
Մարդու իրավունքների պաշտպան Արման Թաթոյանն ընդունել է ՀՀ-ում Բուլղարիայի Հանրապետության արտակարգ և լիազոր դեսպան Մարիա Պավլովա Ցոցորկովային: Այս մասին հայտնում է ՀՀ Մարդու իրավունքների պաշտպանի աշխատակազմը:
Հանդիպման ընթացքում քննարկվել են Բուլղարիայի Հանրապետության դեսպանատան աջակցությամբ սպառողների իրավունքների պաշտպանության ոլորտում Մարդու իրավունքների պաշտպանի աշխատակազմի կարողությունների զարգացմանն ուղղված ծրագրի արդյունքները:
Մարդու իրավունքների պաշտպանը բարձր է գնահատել ծրագրի շրջանակում սպառողների իրավունքների վերաբերյալ տեղեկատվական հոլովակների հեռարձակումը, փոխադարձ այցելությունների, սեմինարների, քննարկումների, համաժողովի անցկացումը:
Կողմերը պայմանավորվածություն են ձեռք բերել առաջիկայում համատեղ աշխատանքի ուղղվածությունը կենտրոնացնել աշխատանքային իրավունքների պաշտպանության բարձրացման վրա: Մասնավորապես, համատեղ քայլեր իրականացնեն կանանց, մանկահասակ երեխաներ ունեցող աշխատող մայրերի և այլ անձանց իրավունքների երաշխավորման համար: