ԵՐԵՎԱՆ, ՍԵՊՏԵՄԲԵՐԻ 28, 24News
Ֆրանսիայի նախկին նախագահ Ժակ Շիրակի հարազատները որոշել են բոլոր ցանկացողներին հնարավորություն տրամադրել վերջին հրաժեշտը տալ հանգուցյալ քաղաքական գործչին։ Այս մասին հաղորդում է ՏԱՍՍ-ը՝ հղում անելով BFM հեռուստաալիքին:
Կիրակի տեղական ժամանակով ժամը 14:00-ին հանգուցյալի աճյունով դագաղը կդրվի Փարիզի Հաշմանդամների տան պատմական համալիրի տարածքում գտնվող Սեն Լուի տաճարի մոտ: Մոտակայքում ցավակցությունների համար գրքեր կդրվեն:
Արարողության ավարտից հետո դագաղը կտեղափոխվի Սեն Սյուլպիս եկեղեցի, որն այժմ խոշոր արարողությունների անցկացման համար փոխարինում է հրդեհից տուժած Փարիզի Աստվածամոր տաճարին:
Le Parisien-ի տեղեկություններով՝ այժմ Մոնպառնաս գերեզմանատանը աշխատանքներ են տարվում Ժակ Շիրակի հուղարկավորությունը կազմակերպելու համար: Գրանիտե գերեզմանաքարի վրա արդեն գրվել է քաղաքական գործչի անունն ու ծննդյան եւ մահվան տարեթվերը: Գերեզմանը գտնվում է Փարիզի ամենահայտնի գերեզմանատանը, «Հավերժ հանգիստ հանճարին» անվանումով հուշարձանի մոտ: Ժակ Շիրակը կդառնա Ֆրանսիայի 5-րդ Հանրապետության առաջին նախագահը, որը կհուղարկավորվի Փարիզի տարածքում: